VOV4.K’ho- Ồng Lê Văn Thanh Thứ trưởng Bộ Lao động Thương binh mờ Xã hội pa geh dơ̆ lơh broă mờ Ủy ban Nhân dân càr Dăk lăk bè broă lòt sền broă lơh jăt ală gùng dà broă lơh dong kờl bè gơmù rƀah, lơh broă, broă lơh tàm Dăk Lăk.

Dơ̆ lơh broă

Tơngai bơh nam 2016- 2020, Dăk Lăk neh lời mờr 900 tơmàn đong ai Broă lơh jơnau kờñ dà lơgar dê bè gơmù rƀah kơ̆ kơl jăp. Priă jền do neh dong Dăk Lăk bơcri tai bè phan bơna, dong kờl bơtàu tơnguh lơh sa, lơh uă broă lơh broă sa, rề ơnàng lơh uă broă lơh gơmù rƀah, lơh jăt broă lơh dong kờl càn priă ờ sa priă cồng uă nàng bơtàu tơnguh lơh sa, dong kờl bè bơto bơtê, lơh sơnơm, sàng goh tiah ơm kis, hìu ơm...Tàm 5 nam do, mờr 252 rbô hìu bơnhă rƀah mờ ală cau chính sách geh càn priă ngân hàng chính sách dê bal mờ kờp jơh priă neh càn là mờr 7 rbô tơmàn đong.

Ồng Lê Văn Thanh Thứ trưởng Bộ Lao động Thương binh mờ Xã hội jờng rơ ngan ală broă lơh ngan tàm broă lơh gơmù rƀah mờ bơsong broă lơh ai cau lơh broă tàm Dăk Lăk in, bulah bè hơ̆ nàng gơmù rƀah kơ̆ kơl jăp, Dăk Lăk pal geh broă lơh jŏ jòng loh làng, nền cê mờ pal jàu kơnòl ai cau lam bồ bơh tơl tiah dê in. Mơkung pal lam lơh uă broă lơh dong kờl làng bol tus bal lơh sa, sền swì bơta geh ngan lơh broă nàng geh gùng dà bơto bơtê broă lơh, dong kờl jòi broă lơh dipal.

 Cau mblàng Lơ Mu K’Yến