VOV4.K’ho - Quân ủy Dà lơgar-Bộ Quốc phòng neh bơyai lơh lam sồr broă tàm pơrlòng kuơ màng mờ tơngu me “Ling klàng bal mờ gùt lơgar tus bal, dùl nùs tàm pơrlòng rơcang sơndră mờ jai pha kòp Covid-19”.

Đại tướng Phan Văn Giang, Bộ trưởng Bộ Quốc phòng đơng lam dơ̆ pờ tơlik tàm Anih đơng lam Bộ Quốc phòng bal mờ 220 anih pờ tơlik tàm gùt lơgar. Broă tàm pơrlòng kuơ màng “Ling klàng bal mờ gùt lơgar tus bal, dùl nùs pơrlòng rơcang sơndră mờ jai pha kòp Covid-19” tơrgùm tàm broă pơgồp bal, dong kờl bal mờ cấp ủy, gơnoar atbồ ƀòn lơgar bơsong kal ke, dong kờl tơnhào mờ tăc phan geh lơh bơh broă lơh sa suơn sre, phan tam, ai phan geh kuơ drơng rài kis mờ sền gàr bơta pràn kơl dang să jan làng bol; rơcang gùng dà broă rơcang sơndră mờ kòp gơtờp tàm bơta uă rơlao nàng di tŭ rơcang sơndră, bơsong, bañ lời ờ thàn, ni sơna tàm ală bơta gơlik geh. Tàm ngai sơnrờp tơn lam sồr, geh 1 rơbô 96 nă kuang bàng, cau bơsram đah lơh sơnơm ling klàng pơn jăt tai tus tàm ƀòn dờng Hồ Chí Minh mờ ală càr hờ đah jum dà lơgar lơh kơnòl rơcang sơndră mờ kòp Covid-19.

Cau mblàng Ndong Brawl