VOV4.K’ho- Mho ngai 11/6, Bộ Tài chính neh bơyai lơh dơ̆ dờp priă tă pơgồp dong kờl tàm Kes priă vaccine rcang sơndră kòp Covid-19 bơh bàr pe mpồl cau mờ mpồl lơh sa kă bro. Bộ trưởng Tài chính ồng Hồ Đức Phớc neh sền mờ jàu sră dờp tă pơgồp dong kờl ai ală cau dong kờl in.

Tàm dơ̆ dờp, Bộ trưởng Tài chính ồng Hồ Đức Phớc mờ Kuang đơng lam bồ Kes priă neh dờp priă tă pơgồp dong kờl bơh 5 mpồl cau dong kờl mờ khà priă rlau 320 tơmàn đong. Ala mat Kuang bàng tàm ală anih lơh broă Kho bạc dà lơgar, Kuang atbồ dờng ồng Nguyễn Đức Chi kung neh jàu tàm Kes priă tă pơgồp bal là 3 tơmàn 450 tơlak đong. Bộ trưởng Tài Chính ồng Hồ Đức Phớc đơs: tàm tơngai lơh gơlik phan, lơh sa kă bro bơh Mpồl lơh sa kă bro dê gơtìp uă ngan kal ke tài bơh kòp Covid-19, mơya uă mpồl lơh sa kă bro neh lơh ngan tơrmù priă jền, ờ mìng gàr niam broă lơh mờ gam tă priă jền tă pơgồp bal tàm Kes priă vaccine rcang sơndră kòp.

Cau mblàng K’Hạnh