VOV4.K’ho- Drim ngai 11/11, jat broă lơh dơ̆ pơrjum dê, tơnơ̆ tŭ tơn jơh broă gơ wèt gah lơh broă, cau ling sồt să mờ mpồl bơtiàn tàm pơrjum dơ̆ 2, Quốc hội pơn jat tai tơngume lùp mờ hơ jơnau lùp gơ wèt tus mờ Bộ trưởng Bộ Giáo dục mờ Đào tạo.

Ală tơngume mờ kuang bàng Quốc hội sền gròi, tơlik jơnau lùp gơ wèt tus mờ Bộ trưởng Bộ Giáo dục mờ Đào tạo ồng Nguyễn Kim Sơn tơrgùm tàm ală broă mờ mpồl bơtiàn sền gròi tŭ do, hơ̆ là: bơta niam bơto bơtê mờ bơsram pờ tơn tàm internet, bơta niam cih gơs sră măi jat broă lơh bơto bơsram phổ thông pa, bơto bơtê bơ tơl, bơsram bơ tơl tàm internet. Hơ tơngume do, Bộ trưởng Bộ Giáo dục mờ Đào tạo ồng Nguyễn Kim Sơn pà git, broă bơto bơtê mờ bơsram pờ tơn tàm internet jơh ală tŭ tơngai bè tŭ do ờ hềt geh bơh lài tus tŭ do den tàng gơtìp uă ngan kal ke. Jat khà kờp, ờ di là 1 tơlak 500 rbô nă kơnòm bơsram ờ geh măi mok bơsram, mờ mùl màl geh rlau 1 tơlak 800 rbô nă kơnòm bơsram tŭ do ờ geh khat dùl bơta măi mok lơi nàng bơsram tàm internet. Bulah bè hơ̆, tŭ do gah Giáo dục mờ Đào tạo gam lơh ngan nàng gàr bơta niam bơto bơtê mờ bơsram ndrờm bal đah ală broă lơh. Bộ trưởng Bộ Giáo dục mờ Đào tạo cih dờp jơnau đơs bơh ală kuang bàng dê mờ hơ pơrgon geh jơnau đơng lam mùl màl tàm tơngai tus.

Cau mblàng K’Duẩn