VOV4.K’ho- Drim ngai 15/11, Đại tướng Tô Lâm, Ủy viên Bộ Chính trị, Bộ trưởng Bộ Kuang àng neh geh dơ̆ lơh broă mờ kuang đơng lam bồ tờm ngan càr Điện Biên. Đơs tàm dơ̆ lơh broă, Đại tướng Tô Lâm, Ủy viên Bộ Chính trị, Bộ trưởng Bộ Kuang àng đơs niam ală cồng nha mờ càr Điện Biên neh lơh geh tàm tơngai lài.

Bè kơnòl broă tờm tàm tơngai tus, Đại tướng Tô Lâm sồr càr Điện Biên pơn jat tai chồl mhar tơngai lam lơh ală rơndap broă lơh kuơmàng, bè Rơndap broă lơh lơh niam ƀlàng rơndeh par Điện Biên mờ broă lam lơh kấp kơnhoàl ù tiah; bơt bơtàu ală rơndap broă bơtàu tơnguh lơh sa suơn sre công nghệ cao; gơ hòi gơ jà bơcri priă tam tờm mắc ca nàng ờ mìng drơng ală jơnau kờñ glòm tơlir ù gời, mờ gam dong cau lơh broă geh broă lơh, geh priă jền lơh geh kơ̆ kơljap sùm. Tŭ do, rài kis làng bol tàm tiah kơh bơnơm kung gam uă kal ke; 2, 3 tiah kung gam ờ hềt geh gùng che ồs đèng dà lơgar, bè hơ̆ den tàng càr Điện Biên pal rơcang lài rlau tai tàm broă lam lơh ală broă lơh, rơndap broă wèt hờ kấp hơ đơm, wèt tus jơnau kờñ tơnguh niam rài kis làng bol dê, cèng wơl hờm ram, gơboh gơbài ngan ngồn ai làng bol in.

Cau mblàng K’Duẩn