VOV4.K’ho- Dờp jơnau jà bơh Bộ trưởng Bộ Quốc phòng lơgar Việt Nam dê, Mpồl kuang bàng ala mat mpồl ling kấp dờng màng lơgar Lo dê bơh ồng Ngụy Phượng Hoà Thượng tướng, Kuang geh jơng tàm Chính phủ mơkung là Bộ trưởng Bộ Quốc phòng lơgar Lo neh lơh Kuang ătbồ mpồl lòt còp ngan ngồn lơgar Việt Nam bơh ngai 24- 27/04.

Dơ̆ bơyai lơh wă rò geh bơyai lơh tàm mho ngai 25/4 tàm Hà Nội bơh ồng Phan Văn Giang Thượng tướng, Ủy viên Bộ Chính trị, Phó Bí thư Quân ủy Dà lơgar, Bộ trưởng Bộ Quốc phòng Việt Nam đơng lam. Tơnơ̆ dơ̆ bơyai lơh wă rò, mpồl kuang bàng ala măt ling klàng kấp dờng màng bơh 2 lơgar dê neh bơyai lơh cribơyai. Ồng Phan Văn Giang Thượng tướng, Bộ trưởng Bộ Quốc phòng Việt Nam đơs nền: Đảng, Dà lơgar, Chính phủ mờ Mpồl ling klàng làng bol Việt Nam sùm sền dờng màng broă lơh kơ̆ kơl jăp nùs nhơm lơh bơyô bal ờs mờng bơh yau mờ tơnguh bơta gĭt gơ̆p tam klăc lơh broă bal jŏ jòng tơl làm mờ lơgar Lo.

Ồng Ngụy Phượng Hoà Thượng tướng, Bộ trưởng Bộ Quốc phòng lơgar Lo đơs nền, gĭt gơ̆p lơh broă bal sền gàr dà lơgar đah Lo mờ Việt Nam là dùl tàm ală broă lơh kuơmàng, pơgồp bơnah tơnguh uă bơta gĭt gơ̆p lơh bơyô bal, lơh broă bal đah 2 Đảng, Dà lơgar, tài bơta kuơ bơh làng bol 2 lơgar dê, tài bơta ring lơngai, kơ̆ kơl jăp, lơh broă bal mờ bơtàu tơnguh tàm tơl lơgar dê kung bè bơh kơnhoàl ù tiah do dê mờ dunia dê.

Cau mblàng Lơ Mu K’Yến