VOV4.K’ho- Tàm Hà Nội, Thượng tướng Phan Văn Giang, Bộ trưởng Bộ Quốc phòng neh lơh broă mờ ală anih lơh broă, mpồl lơh broă bè broă lơh gàr ờdo ờdă ai dơ̆ tĕ khà kuang bàng Quốc hội khóa 15 mờ kuang bàng Hội đồng Nhân dân ală kấp tơngai lơh broă bơh nam 2021 tus nam 2026.

Tàm dơ̆ lơh broă, Thượng tướng Phan Văn Giang sồr ală anih lơh broă, mpồl lơh broă pơn jat tai sơlơ tơnguh ală broă lơh git loh broă gơlik geh, sùm tàm yal jơnau tơnggit đah ală mpồl lơh broă, đal git, sền sơwì, đơs lài di ală kai lơh broă dră wơl bơh ală mpồl sò tơm, mpồl pơr lơ̆ dră dê. Ală mpồl lơh broă geh gơnoar sền gròi, atbồ nền nòn tiah kơl wàng trồ, tiah dà lềng, bồt dà lềng, tiah nhàr dà lơgar, ù tiah tàm lơgar mờ internet, rơcang lài mpồl lơh broă, phan bơna, tŭ lơi kung rơcang tus bal bơsong geh cồng nha lâw broă gơlik geh.

Mpồl ling gàr sùm nền nòn broă ơm gak, pơgồp bal mờ ală anih lơh broă, mpồl lơh broă tàm ling klàng mờ bơdìh ling klàng nàng git loh broă gơlik geh, sền gàr ờdo ờdă dơ̆ tĕ khà. Bal mờ broă lam lơh nền nòn ală broă lơh rơcang sơndră kòp Covid-19, Thượng tướng Phan Văn Giang sồr ală anih lơh broă, mpồl lơh broă pal pơn jat tai lơh niam broă lơh mblàng yal, dong kuang bàng, cau ling tàm mpồl ling lam lơh niam gơnoar, kơnòl làng bol tus bal tĕ khà.

Cau mblàng K’Duẩn