VOV4.K’ho - Mho òr (28/06), Mpồl kuang bàng dờng màng đah sền gàr bơta lơngăp lơngai lơgar Việt Nam geh Đại tướng Tô Lâm, Bộ trưởng Bộ Kuang àng lam bồ neh tus pơrjum pơlam broă đơng lam dờng màng Mpồl ală lơgar Đông Nam Á (ASEAN) mờ lơgar Nga dơ̆ sơnrờp geh bơyai lơh jăt broă lơh pờ tơlĭk tàm internet.

Đơs tàm pơrjum, Bộ trưởng Tô Lâm đơs tờm, do là broă lơh kuơ màng ngan, nàng chồl pràn mờ lơh niam rơlao broă lơh bal jŏ jòng đah mpồl ASEAN mờ lơgar Nga; đơs uă tus mờ broă pal tơlĭk uă kơnòl nàng chồl pràn broă bơceh lơh do geh cồng nha mờ mùl màl rơlao, tŭ lơi kung rơcang lài lơh broă bal, tam pà bal broă mờng chài mờ ală lơgar tàm mpồl ASEAN mờ lơgar Nga nàng tơnguh uă bơta pràn bơsong ală broă bal.

Bộ trưởng Tô Lâm hòi jà, tơngai tus, ală lơgar, tiah do tơnguh ală broă bơ̆t bơtàu nùs nhơm pin dờn, crơng gơs ală gah cri bơyai geh cồng nha nàng tam gơl nùs nhơm, di tŭ bơsong jơnau ờ ring bal, chồl pràn broă lơh geh kuơ bal, tơnguh bơtàu lơh broă sa mpồl bơtiàn kơl jăp. Tàm pơrjum, ală kuang bàng neh cri bơyai, pơlam bal bè ală broă nàng geh sùm, gàr niam chính trị, gàr niam bơta lơngăp lơngai tàm mpồl ASEAN mờ ơnàng rơlao tai là tiah châu Á – Thái Bình Dương.

Cau mblàng Ndong Brawl