VOV4.K’ho- Mho ngai 14/4, Bộ trưởng Ngoại giao, ồng Bùi Thanh Sơn geh dơ̆ cribơyai pờ tơlik tơn tàm internet mờ Bộ trưởng Ngoại giao Australia mò Marise Payne, Bộ trưởng Ngoaị giao Malaysia ồng Hishammuddin Husein, Bộ trưởng Ngoại giao Philippines ồng Teodoro Locsin.

Tàm ală dơ̆ cribơyai, ală Bộ trưởng ring bal tàm tơngai tus geh pơgồp bal jơh nùs tơnguh git gơp mờ Việt Nam tàm tơl gah pơn jat tai lơh geh cồng nha, tàm hơ̆ tơrgùm tàm ală tơngume tờm bè tơnguh cribơyai broă mpồl kuang bàng tŭ neh gơtùi, sơlơ tìp mat dờng màng mờ ală kấp hơđơm jat ală broă lơh ngac ngar; lam lơh jat geh cồng nha ală cơ chế lơh broă bal mờ jơnau ring bal 2 gah; chồl pràn mờ lơh niam rlau tai lơh broă bal sền gàr lơngap lơngai- sền gàr dà lơgar; pơn jat tai tàm dong kờl bal mờ gơp bè phan lơh gơs bơh suơn sre- phan tàm dà tac hờ lơgar ndai, kă bro- bơcri priă mờ lơh broă bal ODA. Ală Bộ trưởng ring bal geh pơn jat tai pơgồp bal jơh nùs tàm ală cribơyai uă lơgar, kung bè tàm ală broă tàm tiah do mờ dunia sền gròi bal.

Cau mblàng K’Duẩn