VOV4.K’ho - Tàm ƀòn dờng Trùng Khánh, lơgar Lo, Bộ trưởng Ngoại giao ồng Bùi Thanh Sơn neh geh dơ̆ tìp bal mờ Phó Thủ tướng, Bộ trưởng Ngoại giao mờ lơh broă bal mờ dunia lơgar Campuchia ồng Prak Sokhonn di tàm dơ̆ tus pơrjum kuơ màng Bộ trưởng Ngoại giao mpồl ASEAN mờ lơgar Lo bal mờ pơrjum Bộ trưởng lơh broă bal Mekong – Lan Thương dơ̆ 6.

Bộ trưởng Ngoại giao ồng Bùi Thanh Sơn tìp bal mờ Phó Thủ tướng, Bộ trưởng Ngoại giao mờ lơh broă bal mờ dunia lơgar Campuchia

Tàm dơ̆ tìp, Bàr Bộ trưởng tơlĭk nùs nhơm di nùs tàm broă gĭt gơ̆p đah lơgar Việt Nam mờ lơgar Campuchia neh gàr geh khà tơnguh bơtàu niam tàm tơngai do mờ bơta kòp gơtờp; bàr lơgar geh sùm broă tìp bal, cri bơyai bal dờng màng sùm mờ tơnguh cồng nha ală cơ chế lơh broă bal đah bàr lơgar. Bàr gah ring bal tơnguh broă pơgồp bal atbồ tiah nhàr dà lơgar, kơrian broă sơgràm mŭt mờ lĭk ờ di mờ adăt boh lam, mờ ai tơl bơta ƀuơn nàng tàm pơgơl broă kă bro tiah nhàr dà lơgar; pơn jờng broă ai bàr mpồng nhàr dà lơgar dunia Tân Nam (càr Tây Ninh) – Mơn Chây (càr Prey Veng) lơh broă bơh ngai 31 nhai 5 pa do.

Cau mblàng Ndong Brawl