VOV4.K’ho- Ngai òr (11/10), Đại tướng Tô Lâm, Bộ trưởng Bộ Kuang àng neh geh dơ̆ pơrjum pờ tơlik tàm internet mờ mò Josephine Teo, Bộ trưởng Bộ Truyền thông mờ Thông tin mờ kung là Bộ trưởng drơng broă sền gàr bơta lơngăp lơngai internet lơgar Singapore.

Pơrjum pờ tơlik tàm internet Bộ Kuang àng lơgar Việt Nam mờ Bộ sền gàr bơta lơngăp lơngai internet lơgar Singapore

Bộ trưởng Tô Lâm đơs loh, broă lơh git gơ̆p lơh broă bal kuơ màng đah lơgar Việt Nam mờ lơgar Singapore tơngai do geh gơguh sùm mờ tơnguh bơtàu tàm uă gah broă. Broă lơh git gơ̆p đah Bộ Kuang àng lơgar Việt Nam mờ ală anih lơh broă lơh jăt adăt boh lam lơgar Singapore pơn jăt tai geh lơh mờ tơnguh bơtàu. Bộ Kuang àng lơgar Việt Nam mờ ală anih lơh broă geh gơnoar lơgar Singapore neh rơhời pờ ơnàng broă lơh bal, tam gơl jơnau tơngit bơh ală anih lơh broă geh gơnoar đah bàr gah nàng cri bơyai bè broă kờñ lơh broă bal tàm gah sền gàr bơta lơngăp lơngai internet mờ rơcang sơndră mờ cau tìs internet. Bè đah să tờm, mò Josephine Teo đơs, lơgar Singapore geh hòi jà, cri bơyai, tìp mờ ală lơgar dờng, geh bơta pràn bè công nghệ bè lơgar Mỹ, Nhờk, Hàn Quốc nàng ală lơgar do kờñ bal, dong kờl ai ală anih lơh broă geh gơnoar bè bơta lơngăp lơngai internet tàm mpồl ASEAN geh tìp mờ ngui tàm broă sền gàr niam bơta lơngăp lơngai.

Cau mblàng Ndong Brawl