VOV4.K’ho- Ngai 30/11, Ƀộ trưởng Ƀộ Y tế ồng Nguyễn Thanh Long geh dơ̆ lơh broă mờ kuang ala măt bơh Mpồl Lơh sơnơm Dunia tàm Việt Nam, Anih tờm Gròi sền mờ rơcăng sơndră lài kòp bơtờp lơgar Mỹ tàm tiah đah jum măt tơngai lik châu Á mờ Broă lơh Lơngăp lơngai Lơh sơnơm gùt plai ù CDC Mỹ tàm Việt Nam nàng cribơyai yal tơngĭt jơnau bè gùng dà rơcăng sơndră lài jơi tam gơl să pa Omicron. Ƀộ trưởng Ƀộ Y tế ồng Nguyễn Thanh Long pà gĭt, tus tŭ do, Việt Nam ờ hềt gŏ cau bơtờp kòp Covid-19 bơtờp mờ jơi tam gơl să pa Omicron.

Nàng rơcăng lài sơndră wơl tềng đăp jơnau pơhìn jơi tam gơl să do lơh bơtờp tàm lơgar he, Ƀộ Y tế neh dan mờ Chính phủ sền swì sồr ơm ing lơh ală dơ̆ rơndeh par lòt mờ rê bơh ală lơgar:  Nam Phi, Botswana, Namibia, Zimbabwe, Eswatini, Lesotho, Mozambique mờ ơm ing lơh sră ai gơnoar mŭt tàm lơgar gơwèt mờ năc lòt mờ rê bơh ală dà lơgar pa yal. Ală mpồl pa yal pà gĭt, rơcăng tàm yal tơngĭt bal jơnau mờ yal tơngĭt cồng nha mblàng sền is gene ală cau bơtờp kòp Covid-19 nàng geh tal jơnau yal dong kờl Việt Nam tam dră wơl mờ ală jơi tam gơl să pa bơh virus Sars CoV-2 dê.

Cau mblàng Lơ Mu K’Yến