VOV4.K’ho- Tơnơ̆ mờ tŭ geh dờp ờ uă cau neh jơh tơngai tam cah is tơrgùm bal 14 ngai mơya kung gam gŏ mờ virus Sars CoV-2, lơh gơtòp kòp, Bộ Y tế tơlĭk kơrnoăt tơnjŏ ing tơngai tam cah is tơrgùm bal.

Do là tơngu me tàm jơnau yal jal mhar pa geh Cục Y tế rơcang sơndră mờ kòp pơyoa tus anih tờm sền gròi kòp tê jê să ală càr, ƀòn dờng in. Jăt mờ hơ̆, lơh jăt jơnau đơng lam bơh Phó Thủ tướng Chính phủ, kuang atbồ mpồl đơng lam dà lơgar rơcang sơndră mờ kòp Covid-19, Cục Y tế rơcang sơndră mờ kòp gơwèt Bộ Y tế sồr ală càr, ƀòn dờng ơm ing ờ hềt bơsong broă tơn jơh mờ ai lĭk bơdìh tiah tam cah is tơrgùm bal gơwèt mờ jơh ală cau neh tơl mờ jơh tơngai tam cah is (hơ̆ là neh tam cah is tơrgùm bal tơl 14 ngai, xét nghiệm 2 dơ̆ ờ gŏ mờ kòp).

Tơngai sơn đờm jơh jăt bơh 12 jơ mang ngai do (04/05) tus tàm tŭ geh jơnau yal pa bơh Mpồl đơng lam Dà lơgar rơcang sơndră mờ kòp Covid-19.

Cau mblàng Ndong Brawl