VOV4.K’ho- Drim ngai 19/09, Bộ Y tế ngan ngồn yal bè broă Mpồl duh broă nùs nhơm dà lơgar tàm kơlôi sơnơng gah lơh sơnơm dà lơgar neh ring bal cồng nha gùl tơngai cĭt tơrlòng lài tơngai dơ̆ 3 vaccine Nanocovax, mơkung pà gĭt, vaccine do geh bơta ờdo ờdă mờ bơta gơlik phan ờ bơtờp kòp mơya tŭ do ờ hềt geh khà sồ nàng sền swì tơn cồng nha sền gàr.

Jăt mờ hơ̆, Mpồl duh broă nùs nhơm dà lơgar tàm tŭ kơlôi sơnơng gah lơh sơnơm dà lơgar neh pơrjum sền swì cồng nha gùl tơngai cĭt tơrlòng lài tơngai dơ̆ 3 vaccine Nanocovax mờ cồng nha kơlôi sơnơng tus ngai 02/9/2021. Bè cồng nha sền gàr ( cồng nha kuơmàng ngan rlau jơh bè bơta niam), tus tơngai do, kung gam ờ hềt geh khà sồ nàng sền swì tơn cồng nha sền gàr bơh vaccine Nanocovax dê jăt tàm khà cau bơtờp kòp Covid-19 tàm kơlôi sơnơng, pal pơn jăt tai geh bơta sền swì bè cồng nha sền gàr jăt tơngume geh sền swì ring bal.

Cau mblàng Lơ Mu K’Yến