VOV4.K’ho- Ủy ƀan Ñân zân ƀòn dờng Buôn Ma Thuột, càr Dăk Lăk neh geh sră nggal ai gơnoar ngui 2, 3 broă lơh rơcang sơndră kòp Kovid-19 tàm ƀòn dờng. Jat hơ̆, sơn đờm bơh 6 jơ drim ngai 06/01, Ủy ƀan Ñân zân ƀòn dờng Buôn Ma Thuột geh ai gơnoar bơyai lơh ală broă lơh tàm hìu, hờ bơdìh mờ bơta pal jat là ờ tơrgùm uă ir 60 nă cau tàm dùl tŭ jơ mờ rlau 90% cau tus bal pal geh cit tơl 2 ding sơnơm vaccine halà neh bời kòp Kovid-19 ờ rlau 6 nhai, gàr niam lơh jat jơnau sồr 5K. Mìng is tàm broă bơyai lơh ies tơp ƀồc, ñô bau ờ huan ai uă cau tus bal mờ geh bơta gròi sền bơh gơnoar atbồ tàm ƀòn lơgar dê.

Ai gơnoar lơh broă wơl broă pơndiang nac gơl gùng ờ tam gơl tàm gơlam ƀòn dờng mờ lòt tus ală càr, rơndeh buýt, taxi, rơndeh pơrgon lòt nhơl; ală anih tac bro phan ñô sa ndrờm geh lơh broă wơl mơya pal lơh jat ală broă lơh ờdo ờdă tàm rơcang sơndră kòp. Mìng is ală anih tac bro phan ñô sa mìng geh drơng ờ rlau 20 nă nac tàm dùl tŭ jơ. Gơ wèt mờ broă lòt bơsram wơl, sră nggal sồr ơm ing ală broă lơh bơto bơsram gơ wèt mờ kấp mầm non. Lam lơh bơto bơsram tơn gơ wèt tus mờ ơdŭ 9, ơdŭ 12 sơn đờm bơh ngai 10/01/2022. Gơ wèt mờ ală ơdŭ kấp 1, kấp 2, kấp 3 gam wơl pơn jat tai bơyai lơh bơto bơsram pờ tơn tàm internet.

Cau mblàng K’Duẩn