VOV4.K’ho- Brê tàm Tiah sền gàr Ea Sô, kơnhoàl Ea Kar, càr Dăk Lăk rềp nhàr bal mờ ală càr Gia Lai mờ Phú Yên gam gơtìp sơgràm aniai tus pal yal lài ngan. Sơmờm bơta kòp Covid-19 gam lơh bơtờp kal ke, gĭt nđờ jơ̆t nă bol mus kơl kơñau brê bơh đah càr Gia Lai ur ar mŭt kơñau tàm brê Ea Sô pah ngai. Ală bol mus kơl kơñau brê do mus kơl chi, ting cuh phan brê, koh kơl jơh dơm chi kuơ mờ phan brê. Bol do khin bơrnañ ngan, rơlĕc rơliang ngan, bal mờ uă ngan cau, geh bal phan tam lơh, sùm rơcăng lơh wơl, geh tŭ lam mpồl cau lòt dong kờl gơ̆p, tung kơñau wơl phan gơtìp kŭp. Ală bă brê dờng là tiah ơm kis bơh ală gơbai ờ huan ngan geh gam wơl tàm Tây Nguyên gam pơhìn uă ngan.

 Dùl ngai lồi nhai 8, kơno geh jơnau yal bol mus kơl kơñau brê ur ar tàm hoài jà gơ̆p mŭt tàm brê sền gàr Ea Sô, gơwèt bă brê 616, brê rềp nhàr bal mờ càr Gia Lai, kuang đơng lam bồ Tiah sền gàr brê Ea Sô sơrbac mhar tơn lòt gùng jòng 90 kơi sồ mŭt tàm brê nàng tiăp. Pơgăp 6 jiơ mho, jơnau yal mờ mpồl cau sền gàr brê in bè mpồl bol mus kơl kơñau brê gam lik bơh brê, 5 nă kuang bàng neh tus tiăp kơryan mờ gŏ rlau jơ̆t nă bol mus kơl kơñau brê gam pơndiang dơm chi brê. Tơnơ̆ hơ̆ tơn bol khi ntoăt dô mŭt jơh tàm brê, mpồl lơh broă mìng kŭp geh 1 nă cau.

Tơnơ̆ tŭ kŭp geh cau do bal mờ phan kŭp bàn là 6 nơm rơndeh đồ, 2 nơm rơnđòt măy, 1 ngkơr phàu đồ mờ rlau 1 tạ dơm chi trắc kuơ ngan, kuang đơng lam bồ Tiah sền gàr brê Ea Sô neh hòi điện thoại ai Hạt Kiểm lâm kơnhoàl Krông Pa, càr Gia Lai dan dong kờl mờ bơsong. Pơgăp 3 jiơ tơnơ̆, hơ̆ là di 9 jiơ mang, mpồl lơh broă bơh Hạt Kiểm lâm kơnhoàl Krông Pa dê ơm ngài mờ anih do mờr 50 kơi sồ hơ̆ sồng lòt tus anih, dờp cau kung bè jun phan kŭp geh jun rê hờ kơnhoàl Krông Pa nàng bơsong.

Ngai tơnơ̆, mpồl sền gàr brê 616 sền gŏ tai dùl mpồl bol mus kơl kơñau brê pơndiang uă ngan dơm chi kuơ bơh brê sền gàr dô rê hờ càr Gia Lai. Gŏ kuang bàng sền gàr brê, mpồl cau mus kơl kơñau brê bal mờ rlau jơ̆t nơm rơndeh đồ, pơgăp 15 nă cau neh tơnbruh rơndeh mờ ntoăt dô. Tơnơ̆ hơ̆ di pơgăp 10 phuk ting kŭp, kuang bàng sền gàr brê neh kŭp geh 1 nă cau pơndiang bal phan kup bàn là ală dơm chi kơmlai kuơ ngan. Mơya, tŭ do, neh lòt tus ù tiah càr Gia Lai dê, ờ gam gơwèt ù tiah sền gàr bơh Tiah sền gàr brê Ea Sô dê tai. Cau gơtìp kŭp ờ lơh broă bal, tam dră wơl mờ hòi điện thoại gơp mpồl khi dê tus dong kờl. Mìng ờ hềt tơl 30 phuk, gĭt nđờ jơ̆t nă cau,  tê ià bal pềs, yoas, phan tam lơh ur ar lòt tus. Bi Trần Văn Khánh, cau lơh broă tàm Trạm Kiểm lâm sồ 2, Tiah sền gàr brê Ea Sô geh ai tai mŭt tàm anih sền gàr brê 616, rềp nhàr bal mờ càr Gia Lai pà gĭt, neh geh uă dơ̆ broă ndrờm bè hơ̆ sơl, bol mus kơl kơñau brê lam mpồl cau tus dong kờl gơ̆p mờ pìt wơl phan neh kŭp.

Bi Trần Văn Khánh yal: Gơnoar broă, kơnòl broă bơh Tiah sền gàr brê dê den ờ mìng geh tàm brê bơh he dê lơm, gơnoar bơh he dê gam ờ hềt uă, den tàng kal ke tŭ kŭp bol mus kơl kơñau brê. Ngan là bol mus kơl kơñau brê, khi đơs là mpồl sền gàr brê ờ gŏ geh gơnoar kŭp tàm ù tiah Gia Lai dê, đơs bal là kal ke ngan. Khi rơlăc rơliang ngan, tam lơh wơl jàñ ngan nàng khi pìt wơl phan khi dê, dơm chi, rơndeh, phan bơna măy mok rơndeh rơndồ khi dê.

Geh ală cau gơtìp kŭp tŭ gam òt mpàn tàm brê tơn

Ồng Bàn Tiên Thái, Phó Kuang ătbồ Trạm Kiểm lâm sồ 3, Tiah sền gàr brê Ea Sô geh ai tus tàm anih sền gàr brê 616 kung pà gĭt sơl, bol mus kơl kơñau brê tàm tiah rềp nhàr bal, ngan là gơwèt ù tiah càr Gia Lai dê ngai sơlơ khin bơrnañ mờ rơlăc rơliang ngan. Neh geh uă dơ̆ khi lơh pờng wơl, geh tŭ là khi gam geh jơnau kờñ tơn chơ̆t kuang bàng tiah sền gàr brê, nàng kờñ lơh oh mi sền gàr brê tàm tiah sền gàr brê in rơngòt, dơrcul nùs mờ ờ bài kờñ lơh broă tai. Ồng Bàn Tiên Thái, đơs: Tàm tiah sền gàr brê do là geh 2 nă cau gơtìp cuh, 3 nă cau gơtìp srăp. Bè jơnau bi Cao dê, trồ ngai lòt kŭp bol òt dơm chi, bè hơ̆ là tus trồ mang bol khi tus tàm trạm mờ cuh tơn tàm trạm. Dơ̆ bàr là bi Hoàng, mang lòt kŭp bol mus kơl kơñau brê tàm brê, bè hơ̆ là gơtìp srăp bluh klờm soh tơn. Ai bi Tùng, kung lòt tus ndo lơh kơnòl broă tàm do, kŭp dơm chi tàm sơnĕ pa ngai òr ală bi lòt den tài, trồ mang bol khi hoài jà gơp tus mờr dùl rhiang nă tơn lòt lơh bi Tùng, să bồ gơ hòr mhàm uă ngan mờr chơ̆t tơn. Ngai hơ̆ mờ ờ geh dong kờl mhar den là bi Tùng neh chơ̆t.

Ồng Lê Minh Tiến- Kuang ătbồ Tiah sền gàr brê Ea Sô pà gĭt, sơmờm bơta kòp Covid-19, bol mus kơl kơñau brê ur ar tàm hoài jà gơp mŭt tàm bă brê bơh mpồl do dê. Bol khi gam koh kơl jơh ală bơta lơi kuơmàng bơh brê dờng Ea Sô dê bè dơm chi trắc, dơm chi kơmlai, dơm chi hương mờ geh bal phan brê. Bơta do kơlôi rơcăng ngan, tŭ broă lơh sền gàr brê, sền gàr uă phan kis bơh Tiah sền gàr brê Ea Sô dê gam tìp uă ngan kal ke tài bơh ờ tơl cau lơh broă, phan ngui lơh broă mờ ờ geh bơta bơcri priă. Tiah sền gàr brê geh mờr 27 rbô lồ brê, tàm hơ̆ geh mờr 6 rbô lồ brê rềp nhàr bal mờ 2 càr Gia Lai mờ Phú Yên. Tŭ do, broă sền gàr brê rềp nhàr bal pal lòt gùng pơdar, lòt gan 2 càr Gia Lai mờ Phú Yên. Kŭp geh bol mus kơl kơñau brê tàm ală tiah rềp nhàr bal den ndrờm bè ờ gơtùi jun rê hờ ù tiah càr Dăk Lăk dê nàng bơsong. Jăt ồng Lê Minh Tiến yal, geh 2 broă tờm kờñ pal sền gròi đơng lam, sồr lơh bơh càr Dăk Lăk dê kung bè 2 càr Gia Lai mờ Phú Yên dê, tàm hơ̆ geh:  Kung kơ̆p kờñ ngan là ală gah lơh broă geh gơnoar càr gơp bơyô dê sơlơ tơnguh tai broă lòt sền, kung bè tiăp kơryan nàng ală cau do ờ gơtùi mŭt. Dilah mŭt kơñau den kung ờ gơtùi jun geh phan kơñau lik dô ờ. Dơ̆ 2 là jal mhar là kờñ bơcri priă lơh, lơh niam wơl gơl gùng lòt bơh Trạm Kiểm lâm sồ 5 tus Trạm Kiểm lâm sồ 9 nàng bol añ in ntrờn hìu sàl bơh ù tiah Gia Lai rê, sền bal geh bơta ntrờn mờ tŭ gŏ ală cau do mut den jun rê tơn hờ Tiah sền gàr brê den bơta pơhìn bơto tơngkah kung bè bơsong niam rlau. Mờ tŭ do lơh sàl tàm đah Gia Lai, tŭ mờ gŏ ală cau do, den bol añ jun ală cau do lòt gan ƀòn lơgar bơh ală cau do dê den kal ke ngan.

Phan kŭp geh là rơndeh đồ pơndiang dơm chi trắc kuơmàng ngan

Sơmờm bơta kòp kal ke mờ sơmờm ală kal ke bơh mpồl sền gàr brê dê tŭ ờ tơl cau lơh broă, ờ tơl phan bơna, ờ tơl bơta pơgồp đah ală càr, ală cau mus kơl kơñau brê tàm tiah rềp nhàr bal gơwèt ù tiah càr Gia Lai mờ Phú Yên gam ur ar mŭt tàm tiah sền gàr brê Ea Sô, koh kơl jơh dơm chi kuơ, ting cuh jơh phan brê. Chi che brê bơnơm, li la phan kis bơh ală bă brê dờng kuơmàng ai bă brê tàm pơn jăt tai tiah kơh bơnơm mờ tiah rềp kềng gah dà lềng, là tiah ơm kis bơh ală gơbai ờ huan ngan geh dê bơtuah gam wơl dùl êt tàm Tây Nguyên gam gơtìp pơhìn uă ngan. Bơta do, kờñ ngan pal geh bơta mŭt lơh bal bơh jơh bal 3 càr: Dăk Lăk, Gia Lai mờ Phú Yên dê nàng sền gàr brê prăp gàr Ea Sô.

 Cau cih VOV Tây Nguyên- Cau mblàng Lơ Mu K’Yến