VOV4.K’ho- Lơh jat jơnau đơng lam bơh Chính phủ dê kung bè Ủy ban Nhân dân càr Dăk Lăk dê nàng kờñ gơdờp ờdo ờdă, ngac ngar, gròi sền geh cồng nha kòp Covid-19, Ủy ban Nhân dân ƀòn dờng Buôn Ma Thuột ai tơlik sră nggal jal mhar ngui ală broă lơh rơcang sơndră kòp pa, sơn đờm bơh 6 jơ drim ngai 30/11 tus tŭ geh jơnau yal pa. Jat hơ̆, geh gơnoar lam lơh broă lơh tàm hìu, hờ bơdìh mơya ờ rlau 30 nă cau tàm dùl tŭ tơngai; tơrgùm hơ đơm 50 nă cau mơya pal geh rlau 90% khà cau tus bal cit tơl 2 ding sơnơm vaccine halà neh bời kòp Covid-19 ờ rlau 6 nhai; ală cau tus bal pal lơh jat nền nòn jơnau sồr 5K bơh Bộ Y tế dê mờ ơm yah ngài 2 thơk.

Gơ wèt mờ broă drơng ala ờ kuơmàng ờ hềt geh lơh broă wơl; mìng is anih siat sŏ, hìu pờ lơma geh lơh broă wơl mơya pal lơh jat nền nòn ală broă lơh rơcang sơndră kòp. Ală cau siat sŏ pal cit êt ngan rlau jơh 1 ding sơnơm vaccine, bời kòp Covid-19 ờ rlau 6 nhai; drơng broă ờ rlau 3 nă cau tàm dùl tŭ, gàr ơm yah ngài 2 thơk, ờ pờ măi lơh mrềt.

Cau mblàng K’Duẩn