VOV4.K’ho - Mho òr (21/10), UBND ƀòn dờng Buôn Ma Thuột, càr Dăk Lăk neh tơlik sră nggal jal mhar, đơng lam ală xã, sơnah ƀòn lơh jăt nền nòn ală broă rơcang sơndră mờ kòp gơtờp nàng rơcang sơndră mờ bơta ală cau kòp Covid-19 gơguh mhar tàm mpồl bơtiàn.

                Mpồl lơh broă geh gnoar xét nghiệm mhar nàng rơwah cau gơtìp kòp tàm mpồl bơtiàn

Jăt mờ hơ̆, ƀòn dờng Buôn Ma Thuột sồr pơn jăt tai ơm ală broă lơh: Hìu ñô sa, hìu đơs karaoke, hìu bar, hìu massage, hìu kă bro internet, hìu kă bro nhơl điện tử, hìu siăt sŏ, hìu bơka să, anih nhơl chờ kơnòm dềt, ƀlàng coh plai; ală drà lơh is, broă kă bro phan lòt tàm gùng, kă bro phan jăt gah gùng, vé số; pơrjum gah jăt yàng tàm ală hìu yàng, pin dờn, duh khoai; broă lơh chài rơgơi, pơ-rài bồ tơngoh tàm tiah mpồl bơtiàn mờ ală anih drơng ala tàp pràn să jan tàm hìu. Gơwèt mờ hìu kă bro phan sa, dà hùc (hìu ñô, hìu sa, hìu tăc dà kơphe), geh drơng năc tơn mơya pal lơh niam ală kơrnoăt bè broă rơcang sơndră mờ kòp Covid-19.

Tàm ngai òr (21/10), ƀòn dờng Ƀuôn Ma Thuột neh gŏ 30 nă cau geh gŏ mờ virus Sars CoV-2, tàm hơ̆ geh 12 nă cau tàm mpồl bơtiàn. Ƀòn dờng neh jòi, ai mẫu xét nghiệm mhar di pơgăp 4 rơbô nă làng bol kis tàm ƀòn Kô Siêr, sơnah ƀòn Tân Lập nàng mhar jòi cau F0 tàm mpồl bơtiàn, wàng se, kơrian kòp gơtờp. Kờp bal gùt càr Dăk Lăk ngai 21 nhai 10 neh gŏ 92 nă cau gơtờp mờ virus Sars CoV-2. Do là khà cau geh gŏ uă ngan tàm ngai bơh lài tus tŭ do tàm càr Dăk Lăk.

Cau mblàng Ndong Brawl