VOV4.K’ho- Tềng đăp bơta gơbàn kal ke bơh kòp Covid-19 dê tài sùm gŏ uă mpồl cau kòp tàm mpồl bơtiàn, mho ngai 24/10, Ủy ban Nhân dân ƀòn dờng Buôn Ma Thuột, càr Dăk Lăk dê neh geh sră nggal sồr ală anih kă bro drơng broă ñô sa (hìu ñô sa, hìu tăc phan sa, hìu tăc dà kơphê) ơm drơng broă năc in dùl anih tơn, mìng geh ai gơnoar tăc cèng rê. Tơngai lơh jăt là bơh 6 jiơ mho ngai 25/10 tus jơh ngai 10/11/2021.

Lài hơ̆, ngai 21/10, Ủy ban Nhân dân ƀòn dờng Buôn Ma Thuột neh geh sră pơyua mhar nàng tơnguh uă rlau tai broă lơh rơcăng sơndră kòp Covid-19. Bè hơ̆, tàm pơgăp 3 ngai do, Ủy ban Nhân dân ƀòn dờng Buôn Ma Thuột neh sùm geh sră nggal tam gơl ală jơnau sồr bè kă bro drơng broă kờñ pal geh nàng tơnguh uă rlau tai broă lơh rơcăng sơndră kòp Covid-19 tàm ù tiah ƀòn dờng dê. Tàm Dăk Lăk, tàm 24 jiơ do, kờp bơh 4 jiơ mho ngai 23/10 tus 4 jiơ mho ngai 24/10, jơh gùt càr gŏ 93 nă cau bơtờp mờ virus Sars CoV-2, thị xã Buôn Hồ geh khà cau bơtờp uă ngan rlau jơh bal mờ 50 nă, kơnhoàl Cư Mgar 19 nă, ƀòn dờng Buôn Ma Thuột 13 nă mờ kơnhoàl Cư Kuiñ 11 nă.

Cau mblàng Lơ Mu K’Yến