VOV4.K’ho- Ngai 27/8, càr Dăk Lăk neh sơnđờm lơh broă rơndap lơh xét nghiệm mhar kháng nguyên Sars CoV-2 ai gùt làng bol ƀòn dờng Buôn Ma Thuột in nàng kờñ sac rơwah rcang lài, sền gŏ di tŭ cau F0 tàm mpồl bơtiàn. Tàm ngai sơn rờp, ƀòn dờng Buôn Ma Thuột neh xét nghiệm ai pơgap 10 rơbô hìu bơnhă làng bol tàm 2 sơnah ƀòn Thống Nhất mờ Tự An in mờ 62 anih ai mẫu.

Làng bol sơnah ƀòn Thống Nhât lơh test mhar tàm ngai 27/8

Ồng Đoàn Ngọc Thượng, Phó Chủ tịch Ủy ban Nhân dân ƀòn dờng Buôn Ma Thuột pà gĭt, nàng broă lơh ai test mhar kòp Covid-19 gàr niam jat di mờ jơnau sồr, ƀòn dờng neh crơng gơs 70 Mpồl ai mẫu xét nghiệm mờ 2 mpồl ai mẫu ntrờn làm bă tiah lơh ai mẫu xét nghiệm mhar kháng nguyên Sars CoV-2 ai làng bol tàm 21 xã, sơnah ƀòn in. Tơl mpồl lơh jat broă xét nghiệm pơgap 400 nă cau dùl ngai. Tơngai ai mẫu xét nghiệm kờp dŭ geh lơh sir tàm pơgap bơh 5 tus 7 ngai mờ kờp jơh khà xét nghiệm pơgap 375 rơbô nă cau. Ngai 27/8, tàm ală mpồl ai mẫu tàm ù tiah 2 sơnah ƀòn Thống Nhất mờ Tự An ờ hềt sền gŏ cau lơi bơtờp mờ virus Sars CoV-2.

Bơh 6 jơ mho ngai 26 nhai 8, ƀòn dờng Buôn Ma Thuột, càr Dăk Lăk neh lơh jăt broă tam cah ngài mpồl bơtiàn jăt Chỉ thị sồ 16. Jăt mờ hơ̆, tàm 5 ngai sơnrờp, ƀòn dờng sồr làng bol ờ geh lik bơdìh hìu nàng tơrgùm broă xét nghiệm mhar jòi cau F0 tàm mpồl bơtiàn. Tàm tơngai do, UBND ƀòn dờng Buôn Ma Thuột jào ală xã, sơnah ƀòn crơng gơs “siêu thị o đong” nàng drơng ală hìu làng bol gơtìp kal ke in, mờ lơh jăt broă “lòt drà cau ndai in”.

Dơ̆ sơnrờp, ală siêu thị, anih kă bro tàm ƀòn dờng Buôn Ma Thuột lơh jăt broă tăc phan jăt ală “combo phan sa geh kuơ” geh lài mờ ală khà priă bơh 100 rơbô tus 500 rơbô đong nàng di pal mờ broă kờñ ngui sa bơh làng bol dê. Tŭ do geh 5 mpồl ai phan tàm ƀòn dờng geh siêu thị Go Buôn Ma Thuột, siêu thị Co.opmart Buôn Ma Thuột, siêu thị MM Mega Buôn Ma Thuột, mpồl hìu tăc phan Vinmart, Bách hoá xanh neh geh broă lơh tăc phan online, tăc jăt combo mờ lơh jăt broă ring niam khà priă gơwèt mờ uă bơta phan ngui sa geh kuơ.

Cau mblàng Ndong Brawl mờ  K’Hạnh