VOV4.K’ho - Tàm broă lơh “Làng bol lùp - Ƀòn dờng hơ” geh bơyai lơh tàm mang òr (13/09), ồng Lê Hoà Bình, Phó Chủ tịch UBND ƀòn dờng Hồ Chí Minh pà git, cau Shipper tàm ƀòn dờng geh jào phan tus ală quận bơh ngai 16 nhai 9. Tàm broă lơh do, geh uă jơnau lùp geh lùp gơwèt mờ Phó Chủ tịch UBND ƀòn dờng Hồ Chí Minh bè broă lơh thoàr broă tam cah ngài mpồl bơtiàn, broă lòt rê bơh làng bol...

Hơ jơnau lùp bơh làng bol, ồng Lê Hoà Bình pà git: Ƀòn dờng Hồ Chí Minh geh tơngai bơh ngai 16 tus ngai 30 nhai 9 nàng lơh tơrlòng broă lơh thoàr broă tam cah ngài tàm 3 tiah neh geh yal geh sền gròi kòp là Quận 7, kơnhoàl Củ Chi mờ kơnhoàl Cần Giờ. Tŭ ƀòn dờng gam tàm bơta pơn jăt tai lơh jăt broă tàm tiah tam cah ngài mpồl bơtiàn, ală broă lòt rê bơh làng bol geh atbồ mờ phần mềm neh geh tơrgùm ală dữ liệu bè cit sơnơm vaccine, cồng nha xét nghiệm, gùng lòt.

Cau mblàng Ndong Brawl