VOV4.K’ho - Sở Y tế ƀòn dờng Hồ Chí Minh pà gĭt, drim òr (09/08), ƀòn dờng Hồ Chí Minh neh geh Bộ Y tế ai bơtơl 600 rơbô ding sơnơm vaccine AstraZeneca. Tơnơ̆ mờ tŭ geh dờp khà sơnơm vaccine do, ƀòn dờng geh tam pà ai ală quận, kơnhoàl, ƀòn dờng Thủ Đức in nàng pơn jăt tai broă cĭt sơnơm rơcang sơndră mờ kòp.

Kờp bơh ngai 22 nhai 7 tus jơh ngai 08 nhai 8, ƀòn dờng Hồ Chí Minh neh cĭt geh mờr 2 tơlăk 300 rơbô nă. Tàm nhai 8 do, di lah geh tơl sơnơm vaccine, ƀòn dờng Hồ Chí Minh di gơlan geh tus khà gơ glòm sơndră mờ kòp tàm mpồl bơtiàn mờ khà geh bơh 70 tus 80% khà kờp làng bol rơlao 18 sơnam. Gơrềng tus mờ broă cĭt sơnơm vaccine, Sở Y tế ƀòn dờng Hồ Chí Minh pà gĭt kung pa geh jơnau sồr ală hìu sơnơm, anih lơh broă gah lơh sơnơm, ală hìu cĭt sơnơm rơcang sơndră mờ kòp ai tơl bơta niam nàng làng bol in geh cĭt mơ tơn; kham rơwah nàng gĭt di mpồl cau ơm ing cĭt; mblàng loh tài ơm ing ờ jŏ tơngai gơwèt mờ cau gam ngui sơnơm, gam gơtìp kòp jal mhar.

Cau mblàng Ndong Brawl