VOV4.K’ho - UBND ƀòn dờng Hồ Chí Minh pa geh sră nggal jal mhar pơyoa tus Bộ Y tế in nàng yal bè broă blơi, tơmŭt sơnơm vaccine rơcang sơndră mờ kòp Covid-19 bơh ƀòn dờng dê, mùl màl broă blơi 5 tơlăk ding sơnơm vaccine Moderna.

Jăt mờ hơ̆, UBND ƀòn dờng Hồ Chí Minh hòi jà Bộ Y tế ai lơh broă bal dà lơgar bal mờ cau dùl nă să lơh is, bơyai lơh tă priă cĭt sơnơm vaccine. Bè broă cri bơyai mờ blơi sơnơm vaccine Moderna, tơnơ̆ mờ tŭ geh jơnau ring bal bơh Phó Thủ tướng ồng Vũ Đức Đam tàm ngai 15 nhai 6 nam 2021 bè broă blơi mờ tơmŭt sơnơm vaccine bơh lơgar bơdìh; UBND ƀòn dờng Hồ Chí Minh neh jào Công ty Sapharco lơh jăt kơnòl cri bơyai, kĭ hơ bal blơi sơnơm vaccine rơcang sơndră mờ kòp Covid-19 tàm ƀòn dờng in. Tàm tơngu me hơ̆, Công ty Sapharco neh kĭ geh sră bơta geh ai tờm ai broă blơi sơnơm vaccine rơcang sơndră mờ kòp Covid-19 Moderna. Tus tŭ do, Công ty Sapharco gam kơ̆p ala măt đah lơh sơnơm Moderna jào broă rơndăp lơh bal nàng blơi 5 tơlăi ding sơnơm vaccine Moderna. Nàng gàr niam broă geh sơnơm vaccine mờ tơnguh bơta pràn hòi jà tă priă bơh mpồl bơtiàn dê, UBND ƀòn dờng Hồ Chí Minh dan mờ Bộ Y tế pal geh gùng dà broă lơh mùl màl, ai Công ty VinaCapital in lơh jăt broă lơh bal đah dà lơgar mờ cau dùl nă să is, bơyai lơh tă priă cĭt sơnơm vaccine jăt cơ chế “blơi 5 ding sơnơm vaccine geh pà mpồl bơtiàn in 1 ding”.

Cau mblàng Ndong Brawl