VOV4.K’ho- Drim ngai 08/10, Thành ủy, Hội đồng Nhân dân, UBND, Ủy ban Mặt trận dà lơgar Việt Nam ƀòn dờng Hồ Chí Minh bơyai lơh dơ̆ jờng rơ mpồl lơh broă tus dong kờl mờ tus bal dong kờl rcang sơndră kòp Covid-19 tàm ù tiah ƀòn dờng dê.

Tàm dơ̆ jờng rơ, kuang đơng lam bồ ƀòn dờng Hồ Chí Minh pà bằng khen ai 55 mpồl cau mờ gai lòng ƀòn dờng Hồ Chí Minh dê ai 119 nă cau dùl nă să is tài bơh neh geh cồng nha jak ngan, tus bal dong kờl rcang sơndră kòp Covid-19 tàm ù tiah ƀòn dờng dê. Tàm dơ̆ jờng rơ, kuang đơng lam bồ ƀòn dờng Hồ Chí Minh kung pà gĭt, Pơrjum dà lơgar dơ̆ 4 geh uă tơngume kuơ màng, tàm hơ̆ geh tơngume rcang sơndră kòp Covid-19 mờ bơtàu tơnguh wơl lơh sa tàm bơta bè ờs pa. Tềng đap mat, Bộ Chính trị sồr Chính phủ, Mpồl đơng lam dà lơgar mờ ală càr, ƀòn dờng pal tơrgùm, pơgồp bal, bơsong gờñ bơta gĭt nđờ rơbô nă cau lơh broă rê is tàm ƀòn lơgar tờm. Bơdìh broă dong kờl làng bol, cau lơh broă geh jơnau kờñ rê tàm ƀòn lơgar ờdo ờdă, gàr niam ală broă lơh rcang sơndră kòp, pal bơyai lơh niam ngan broă ai cau lơh broă bơh ală tiah rê wơl lơh broă.

Cau mblàng K’Hạnh