VOV4.K’ho- Tàm dơ̆ pơrjum pờ tơlik tơn tàm internet bơh Thường trực Mpồl đơng lam dà lơgar bè rcang sơndră kòp Covid-19 mờ Kuang đơng lam bồ ƀòn dờng Hồ Chí Minh, ồng Vũ Đức Đam- Phó Thủ tướng Chính phủ,  Kuang atbồ Mpồl đơng lam sồr ngan: ƀòn dờng Hồ Chí Minh pal ngui jơh tơngai lơh jat broă lơh ai ơm yah ngài mpồl bơtiàn jat Chỉ thị sồ 16 bơh Thủ tướng Chính phủ dê mờ bơta lơh jat cau lơi ơm tiah lơi den ơm tơn tềng hơ̆ nàng kơryan ală tiah kòp.

Jơnau yal tàm dơ̆ pơrjum, ồng Nguyễn Thành Phong, Chủ tịch UBND ƀòn dờng Hồ Chí Minh pà gĭt, tŭ do ƀòn dờng do gam sơrbăc mhar rcang ală gùng dà broă lơh rcang lài ai broă lơh jat ơm yah ngài mpồl bơtiàn gùt ƀòn dờng tàm tơngai 15 ngai, sơnđờm bơh 0 jiơ mang ngai 9/7 nàng gàr niam rài kis bơh làng bol dê, ờ gơtìp sơrlồng sơrlàng mờ gơtìp gơrềng. Đơs tàm dơ̆ pơrjum, ồng Vũ Đức Đam sồr: ơm yah ngài pal jat di mờ nùs nhơm tơnguh uă rlau tai dùl khà, ngui niam ală ngai ơm yah ngài jat Chỉ thị sồ 16 bơh Thủ tướng Chính phủ dê nàng kơryan kòp.

Cau mblàng K’Hạnh