VOV4.K’ho- Ƀòn dờng Hồ Chí Minh lơh bè lơi nàng gơtùi lam lơh ngan ngồn bơta kơp kơnờm brồ guh ndrờm mờ ală tiah drà tàm tiah Đông Nam Á. Hơ̆ là tơngume mờ ală kuang bàng tơrgùm cribơyai tàm Pơrjum Khoa học “Ai tơlik lài gùng dà bơtàu tơnguh ƀòn dờng Hồ Chí Minh tơngai bơh nam 2021 tus nam 2030 mờ broă wèt sền tus nam 2045” bơh Ủy ban Nhân dân ƀòn dờng bơyai lơh drim ngai 05/5. Pơrjum neh dờp geh rlau 80 jơnau cribơyai bơh ală cau jak chài, cau khoa học, kuang đơng lam bồ ală bộ, Gah broă lơh, hìu bơsram, ală càr tàm tiah lơh sa kuơmàng tiah đah jum.

Ală jơnau cribơyai đơs nền, ƀòn dờng Hồ Chí Minh geh gơnoar broă lam lài rài lơh sa, lơh gơlik bơta pràn gơguh lơh sa ai tiah lơh sa kuơmàng đah jum dà lơgar mờ jơh gùt lơgar in. Den tàng, bơta bơtàu tơnguh bơh ƀòn dờng dê là bơta pơn jờng ai bơta bơtàu tơnguh bơh jơh gùt tiah do mờ jơh gùt lơgar dê in. Ƀòn dờng neh đal git bơtàu tơnguh jat gùng dà tiah drà kơ̆ kơljap, tiah drà ngac ngar den pal tơnguh mhar broă tam gơl số, lam lơh gơnoar atbồ số, mpồl bơtiàn số, tơnguh bơta niam broă drơng ala dà lơgar.

Cau mblàng K’Duẩn