VOV4.K’ho- Tàm dơ̆ pơrjum pờ tơlik tơn tàm internet mho ngai 17/6 mờ ƀòn dờng Hồ Chí Minh bal mờ càr Bắc Giang, ồng Vũ Đức Đam Phó Thủ tướng Chính phủ, Kuang atbồ Mpồl đơng lam dà lơgar rcang sơndră kòp Covid-19, tơngkah ƀòn dờng Hồ Chí Minh pơn jat tai sơlơ tơnguh bơta pràn xét nghiệm, sền gŏ gờñ ală tiah kòp nàng căng tiah kơryan kòp niam, lơh ngan ờ lời broă ai ơm yah ngài gùt ƀòn dờng tàm tơngai jŏ ir mờ pleh mờ lơh gơlik geh bơta atbồ ờ niam tàm tiah wàng se kơryan kòp, ai ơm yah ngài mpồl bơtiàn.

Iang nùs đau mờ bơta pràn xét nghiệm bơh ƀòn dờng Hồ Chí Minh dê tŭ neh geh tơnguh tus 30 rơbô test đơn dùl ngai bè tŭ do, Phó Thủ tướng ồng Vũ Đức Đam tơngkah ƀòn dờng Hồ Chí Minh pal lơh jat niam ală jơnau sồr rcang sơndră kòp, lơh ngan kơryan, bañ lời kòp bơtờp uă tàm tiah lơh sa mờ măy mok. Ai tàm càr Bắc Giang neh ai gơnoar 123 mpồl lơh sa kă bro lơh broă wơl mờ mờr 20 rơbô nă công nhân lơh broă wơl. Jat ồng vũ Đức Đam, càr Bắc Giang pal tam pà is tiah ơm yah ngài tơrgùm bal gam geh cau kòp mờ tiah uă ngai ờ gam geh cau kòp F0, bơh hơ̆ tơrgùm ală broă lơh nàng bơsong jơh tơn tàm ală tiah ai ơm yah ngài tơrgùm bal ờ hềt ờdo ờdă.

Cau mblàng K’Hạnh