VOV4.K’ho- Ƀòn dờng Hồ Chí Minh ờ mìng pal lơh jat jơh nùs ală broă lơh rơcang sơndră kòp, bơdìh hơ̆ tai ƀòn dờng kung pal sơlơ mblàng yal, hòi jà làng bol tam pà bal kal ke, tàm pơn jờng bal mờ gơp tàm broă lơh rơcang sơndră kòp bơtờp. Do là jơnau sồr bơh Phó Thủ tướng ồng Vũ Đức Đam, Kuang atbồ Mpồl đơng lam dà lơgar rơcang sơndră kòp Covid-19 tàm dơ̆ pơrjum tàm jàu broă lơh pờ tơn tàm internet mờ kuang đơng lam bồ ƀòn dờng Hồ Chí Minh mho ngai 14/7 tàm hìu lơh broă Chính phủ.

Tus tŭ do, ƀòn dờng neh dong kờl rlau 130 rbô nă cau lơh broă khat gơboh, mờ mờr 9 rbô nă cau tac vé số, geh 57% broă rơndap lơh; geh quận, kơnhoàl geh 90% dong kờl ai ală cau geh rài kis kal ke, cau tac bro tàm ù tiah he in. Phó Thủ tướng tơngkah ƀòn dờng pơn jat tai sền gròi tus ală cau geh rài kis kal ke, ngan là ală tiah, cụm làng bol ơm kis tơrgùm gal ngan cau rƀah tơnơ̆ tơngai ơm yah ngài bơdìh mờ dong kờl phan bơna, phe, phan sa, phan ngui sa pal geh pah ngai den làng bol kờñ ngan geh bơta dong kờl bè rài kis niam chài, nùs nhơm nàng tơrmù ƀà bơta ờ suk ơm tàm tơngai ơm yah ngài.

Cau mblàng K’Duẩn