VOV4.K’ho- Yal mờ Phó Thủ tướng Thường trực ồng Trương Hòa Bình tàm dơ̆ pơrjum drim ngai 01/6, Chủ tịch Ủy ban Nhân dân ƀòn dờng Hồ Chí Minh ồng Nguyễn Thành Phong pà git, tềng đap jơnau pơhìn kòp bơtờp uă tàm ală anih lơh sa mờ măi mok, khu chế xuất, mờr tus ƀòn dờng geh lam lơh tàm 2, 3 mpồl lơh sa kă bro ờ mìng đal git bă tiah tam cah is mờ gam lơh sa ndang nàng kơryan bơta bơtờp kòp dilah geh. Ƀòn dờng kung lam lơh bơnah dong kờl dơ̆ 2 ai ală mpồl lơh sa kă bro gơtìp gơ rềng tài bơh kòp Covid-19 in.

Tŭ do, ƀòn dờng Hồ Chí Minh neh geh 3 nă cau kòp lơh broă tàm 3 anih lơh sa mờ măi mok là Anih lơh sa mờ măi mok Tân Bình, Anih lơh sa mờ măi mok Tây Bắc Củ Chi, Anih lơh sa mờ măi mok Vĩnh Lộc- Hóc Môn. Jat ồng Nguyễn Thành Phong đơs, tềng đap jơnau pơhìn bơtờp kòp, dùl tàm ală tơngume tờm pal tơrgùm lam lơh tŭ do là ai mẫu công nhân lơh broă tàm anih lơh sa mờ măi mok, khu chế xuất, khu công nghệ cao in. Tŭ do, ƀòn dờng geh 1 tơlak 600 rbô nă công nhân. Mìng is anih lơh sa mờ măi mok, khu chế xuất geh 280 rbô nă công nhân mờ 3 rbô nă cau jak chài, khu công nghệ cao là 45 rbô nă.

Cau mblàng K’Duẩn