VOV4.K’ho - Thành ủy ƀòn dờng Hồ Chí Minh pa bơyai lơh pơrjum tơnkah 46 nam ngai tơnklàs đah jum, dà lơgar tơrgùm bal (30/4/1975 – 30/4/2021).

 Ƀòn dờng Hồ Chí Minh tìp măt 46 nam ngai tơnklàs đah jum, dà lơgar tơrgùm bal

Tàm dơ̆ pơrjum, kuang đơng lam ƀòn dờng Hồ Chí Minh neh bơyai lơh yào pà wơl khà pơn jờng dà lơgar “Cau mè Việt Nam Khin cha jăk chài” dơ̆ 41 gơwèt mờ 14 nă cau mè neh geh bơklao, geh kòn phi să tài broă tơnklàs dà lơgar, bơ̆t bơtàu mờ sền gàr dà lơgar.

Đơs tàm dơ̆ pơrjum, Bí thư Thành ủy ƀòn dờng Hồ Chí Minh ồng Nguyễn Văn Nên đơs tờm, tàm rài lài do tam lơh, bơ̆t bơtàu mờ sền gàr dà lơgar bơh lơgar he dê, broă ngai 30 nhai 4 nam 1975 là dùl tàm ală tơngai àng gơcrà ngan, geh bơngă dờng tàm lơgar mờ tàm dunia. Bí thư Thành ủy ƀòn dờng Hồ Chí Minh tơlĭk nùs nhơm ưn ngài, kah tus ală cau neh ai bơta pràn, poăc să, mhàm bơh să tờm ai broă tam dră nàng geh bơta lơngăp lơngai khăt gơboh is mờ tơrgùm bal dà lơgar, tài bơta gơboh gơbài làng bol dê. Broă lơh do ờ mìng geh kuơ tàm broă tơnguh bơhiàn ờs mờng, pơn jờng ală bơta kuơ rài lài do mờ gam là dơ̆ lam sồr nùs nhơm kờñ gơboh mờ dà lơgar, bơta kis niam, bơta kơ̆p kờñ, bồ tơngoh lơh ngan, tŭ lơi kung rơcang phi să tài dà lơgar, tài làng bol.

Cau mblàng Ndong Brawl