VOV4.K’ho - Drim òr (07/09), tàm Hà Nội, Bộ Nông nghiệp mờ Phát triển Nông thôn pơrjum pờ tơlik tàm internet mờ ală càr, ƀòn dờng mờ Mpồl tam klăc gah phan do nàng cri bơyai bè broă bơsong kal ke ai geh khà tăc phan geh lơh bơh brê bơnơm mờ lơgar bơdìh tàm nam do.

Dơ̆ gơtìp kòp Covid-19 dơ̆ 4 neh mờ gam lơh aniai uă ngan tus mờ broă lơh sa, lơh gơs phan ngui sa bơh ală mpồl lơh sa kă bro gah dơm chi dê, tàm hơ̆ ngan tàm tiah hờ đah jum dà lơgar, do là tiah tơrgùm rơlao 70% khà mpồl lơh sa kă bro, mờ khà priă tăc phan mờ lơgar bơdìh geh tus mờr 80% khà priă tăc phan geh lơh bơh dơm chi mờ lơgar bơdìh bal mờ phan geh lơh bơh brê bơnơm gùt lơgar dê. Kờp dŭ neh geh rơlao nggùl khà mpồl lơh sa kă bro pal ơm ing ha là til mpồng mờ tơmù bơta pràn lơh broă tài kòp gơtờp. Nàng bơsong kal ke ai mpồl lơh sa kă bro in, bè đah Bộ Nông nghiệp mờ Phát triển Nông thôn neh dan mờ Chính phủ mờ Mpồl đơng lam Dà lơgar rơcang sơndră mờ kòp Covid-19 ai lài broă tam pà sơnơm vaccine rơcang sơndră mờ kòp Covid-19 ai ală càr, ƀòn dờng geh mpồl lơh sa kă bro lơh broă in. Mờ dong kờl bal mờ bơto sồr broă lơh sơnơm ai ală mpồl lơh sa kă bro in rơcang blơi mờ xét nghiệm mhar mờ xét nghiệm di jăt mờ gùng dà broă lơh PCR dong kờl tơmù priă tă; ai ală mpồl lơh sa kă bro rơcang jòi geh sơnơm vaccine nàng cit ai cau lơh broă in.

Cau mblàng Ndong Brawl