VOV4.K’ho- Thủ tướng Chính phủ pa ring bal kơnòl broă bơt bơtàu rơndap lài ù tiah càr Lâm Đồng tơngai bơh nam 2021 tus nam 2030, broă wèt sền tus nam 2050 mờ jơnau kờñ bơtàu tơnguh mhar, tơl làm mờ kơ̆ kơljap, lam Lâm Đồng gơs càr bơtàu tơnguh pràn, tơl làm bơh gùt lơgar dê.

Tơnguh rơndap tap sèng wơl lơh sa, broă lơh tờm là rơndap tap sèng wơl lơh sa suơn sre, wèt tus gah lơh sa suơn sre tơl làm mờ tam gơl pa, là tiah tờm kơlôi sơnơng, lơh sa suơn sre ngui công nghệ cao kấp dà lơgar mờ dunia; bơtàu tơnguh nhơl chờ geh bơta niam, bơt bơtàu ƀòn dờng Dà Làc mờ tiah rềp bal gơ gơs là tiah tờm nhơl chờ bơh gùt lơgar mờ tiah Đông Nam Á dê mờ là tiah tờm bơto bơsram kơlôi sơnơng, bơceh pa khoa học.

Jat hơ̆, ai tơlik gùng dà bơtàu tơnguh, rơndap tap sèng ù tiah mờ tam pà cau lơh broă ai ală broă lơh lơh sa- mpồl bơtiàn Lâm Đồng wèt tus gơguh mhar mờ kơ̆ kơljap mờ 3 gah tờm là lơh sa suơn sre pa, nhơl chờ- broă drơng ala geh bơta niam uă, lơh sa mờ măi mok jat gùng dà sac rơ wah, sền gròi lài bơtàu tơnguh ală gah lơh sa mờ măi mok công nghệ cao, lơh sa mờ măi mok rềp mềr mờ tiah ơm kis.

Cau mblàng K’Duẩn