VOV4.K’ho - Drim òr (15/04), tàm càr Ninh Thuận, Bộ Nông nghiệp mờ Phát triển Nông thôn bơyai lơh pơrjum tơn jơh ing broă tam phan kàl prang nam 2020 – 2021; lơh jăt rơndăp broă lơh sa kàl duh, kàl mìu nam 2021 ală càr jăt gah dà lềng đah jum tàm gùl lơgar mờ Tây Nguyên.

Jăt rơndăp broă lơh kàl duh nam do, tàm gùt tiah do geh rơlao 180 rơbô lồ ù lơh sa, gơguh 20 rơbô lồ pơn drờm mờ kàl lơh sa nam 2020; cồng nha kờp dŭ geh rơlao 61 tạ tàm 1 lồ, gơguh 0,49% tạ tàm 1 lồ; khà geh kờp dŭ 1 rơbô 116 rơbô tấn, gơguh 132 rơbô tấn pơn drờm mờ kàl lơh sa nam 2020.

Ồng Lê Quốc Doanh, Thứ trưởng Bộ Nông nghiệp mờ Phát triển Nông thôn đơs tờm: Ală tiah lơi mờ ờ tơl dà lơh sre, sồr ală càr tam gơl tam ală phan tam ờ jŏ tơngai. Do là ală broă lơh neh ai geh cồng nha niam tàm tơngai pa do. Bè sơntìl kòi sồr ai lài sơntìl kòi geh bơta niam, kòi bơkah; kòi thồm; ală sơntìl kòi ờ jŏ tơngai nàng gàr geh tơl dà tuh mờ kung là broă tềm pềr dà.

Cau mblàng Ndong Brawl