VOV4.K’ho - Geh broă dong kờl yal ù tiah Buôn Ma Thuột ai phan kơphe gar bơh nam 2005, mơya tài mìng tăc gar, den tàng kơphe Buôn Ma Thuột rơhời “roh” tàm drà kă bro. Kơphe Buôn Ma Thuột geh tiơng pơnrơ mơya ờ hềt ngui geh cồng nha, ờ tơnguh uă bơta kuơ ai cau tam kơphe in

Tàm suơn kơphe gam hòn gơs niam, tam bơrlŭ bal mờ tờm sầu riêng. ƀơ, tiêu, ồng Y Ki Buôn Krông, kis tàm ƀòn Kô Tam, xã Ea Tu, ƀòn dờng Buôn Ma Thuột pà git, suơn geh tam jăt broă lơh jăt khà dunia, ai geh cồng nha sùm 3 tấn nggùl kơphe gar tơl lồ.

                   Sơnka sền gàr kơl jăp, kơphe Buôn Ma Thuột ai geh bơta niam krơi is

Là cau tàm Hợp tác xã lơh sa suơn sre Ea Tu, tam kơphe jăt broă lơh kơl jăp, gàr kơphe bơh hìu nhă ồng dê sùm geh blơi lài mờ khà priă kas rơlao mờ drà kă bro. “Pal lơh di mờ jơnau dờp RFA dê, bè hơ̆, hơ̆ sồng cau blơi kơphe he in. Tŭ lơh den pal tơrgùm sră nggal jăt mờ cau atbồ, ƀồm sơnơm, sih phơng bè lơi, tàm tŭ lơi…, mờ pic bè lơi, hơ̆ sồng ală broă lơh ndai bè koh tê, sơnka sền gàr…den ndrờm pal geh bơsram, bơsram tơl. Tus tŭ tăc kơphe den đah hợp tác xã geh pơgồp tai tàm khà priă tăc 1 rơbô đong 1 kĭ ris”.

Chủ tịch Hội đồng quản trị, kuang atbồ Hợp tác xã lơh sa suơn sre broă lơh drơng ala công bằng Ea Tu, ồng Trần Đình Trọng pà gĭt, gơwèt ù tiah Buôn Ma Thuột lơh kơphe geh bơta niam pơnrơ ngan gùt dunia, mờ lơh kơphe jăt khà kờñ bơh dunia dê tai, hơ̆ là bơta pràn nàng hợp tác xã tơnguh bơta kuơ phan geh lơh. Bŭ lah bè hơ̆, tàm git nđờ nam do, ală mpồl lơh sa kă bro mìng geh blơi di pơgăp 50% khà kơphe gar geh sră dờp bơh hợp tác xã dê. Khà gam tai rơlao 300 tấn, hợp tác xã bơyai lơh kơphe ƀòk geh khà măt kă bro Ea Tu mờ lơh kơphe bơkah, rơhời tơnguh bơta kuơ ala mờ broă mìng geh tăc kơphe gar nàng lơh: “Khà măt kă bro geh yal ù tiah kơphe Buôn Ma Thuột đơs mờ nùs nhơm ndrờm bal là gam ờ loh làng ngan, den Mpồl tam klăc kơphe Buôn Ma Thuột geh tam gơl gùng dà broă lơh pa là lơh kơphe bơkah. Hợp tác xã kung là dùl mpồl bơh mpồl tam klăc dê, den tàng kung jơh nùs ngan sơl là nam lơi kung tus pơrlòng lơh kơphe bơkah, bơh tŭ hơ̆ geh pơgồp bal tàm broă bơ̆t bơtàu kơphe Buôn Ma Thuột pal là kơphe geh bơta niam uă, pal là kơphe bơkah nàng dunia git tus mờ he tơnguh uă bơta kuơ tăc, ờ gŏ di mìng tăc kơphe gar bè lài do tai den ờ geh ai tơngŏ uă bơta lơi niam”.

              Lơh kơphe bơkah là gùng dà tơnguh bơtàu pa nàng lơh geh bơta pơnrơ kơphe Buôn Ma Thuột dê

Di ngan là di lah mìng tăc gar gời, kơphe gar geh yal ù tiah Buôn Ma Thuột geh “roh” tàm drà kă bro. Jăt ồng Lê Đức Huy, Phó Kuang atbồ công ty TNHH MTV kă bro mờ lơgar ndai ngai 2 nhai 9 Dăk Lăk yal, khà măt kă bro kơphe Buôn Ma Thuột mìng mùl màl geh kuơ tŭ geh pơgồp bal mờ ală phan kơphe ƀòk, kơphe klài. Kờñ tơnguh broă yal ù tiah kơphe Buôn Ma Thuột den pal pơgồp bal mờ hìu coh, bŏ, pơgồp bal mờ phan geh kă bro dŭt ndơl, nàng ai cau ngui sa in git là mùl màl phan geh ală bơta krơi is. Tàm gơnoar broă là Phó Chủ tịch Mpồl tam klăc kơphe Buôn Ma Thuột, ồng Lê Đức Huy pà git, tàm ală nam do, Mpồl tam klăc neh bơto sồr ală cau tàm mpồl ngui broă yal ù tiah Buôn Ma Thuột ai phan kơphe geh lơh in: “Tŭ do den mpồl tam klăc geh pơn jăt tai yal uă broă ngui broă yal ù tiah kơphe Buôn Ma Thuột là pal geh tiah lơh tàm Buôn Ma Thuột, pal gŏ geh broă blơi kơphe gar bơh tiah geh broă yal ù tiah Buôn Ma Thuột, mờ dơ̆ pe là broă coh, bŏ pal gàr kloh ờ do ờ dă phan sa nàng gàr bơta niam kơphe tơnơ̆ mờ tŭ neh coh pal gàr geh bơta niam bơh kơphe Buôn Ma Thuột là geh gar niam, bơkah. Broă hơ̆ den mpồl tam klăc kờñ ngan geh bơta pràn nàng lam sồr kung bè atbồ broă yal ù tiah tàm broă lơh kơphe coh, bŏ mờ kơphe klài in. Kung lơh ngan geh dùl broă lơh niam nàng gàr niam broă jòi anih tờm lơh gơs, gàr niam broă yal ù tiah mơ, ờ hềt geh lơh broă drà kă bro”.

Yal ù tiah Buôn Ma Thuột ai phan kơphe gar in geh dan cih măt dong kờl tàm lơgar bơh nam 2005, cau tờm ngui là UBND càr Dăk Lăk, Sở Khoa học mờ Công nghệ là anih atbồ, Mpồl tam klăc kơphe Buôn Ma Thuột là mpồl bơyai lơh ngui. Neh geh 12 mpồl tàm ƀòn dờng Buôn Ma Thuột dan ngui yal ù tiah do mờ kờp jơh bă ù mờr 15 rơbô lồ, kờp tiah lơh geh rơlao 46 rơbô tấn kơphe gar pah nam, mờ 9 rơbô hìu làng bol lơh broă sa tus bal lơh. Yal ù tiah lơh kơphe Buôn Ma Thuột kung neh dan cih măt sền gàr dong kờl tàm 10 lơgar mờ kơnhoàl ù tiah, tŭ do gam pơn jăt tai sồr geh sền gàr dong kờl tàm drà kă bro mpồl tam klăc châu Âu mờ lơgar Nhờk. Bơh nam 2016, yal ù tiah Buôn Ma Thuột hơ̆ sồng sơn đờm ngui ai phan kơphe geh lơh in. Tŭ do, pah nam phan geh lơh bơh kơphe coh, bŏ kơphe klài geh logo kơphe Buôn Ma Thuột mìng di pơgăp 80 tấn, dềt ngan ir di lah pơn drờm mờ drà kă bro kung bè bơta tiơng pơnrơ, khà kơphe bơh càr Dăk Lăk dê. Ồng Phạm Gia Việt, Phó kuang atbồ Sở Khoa học công nghệ càr Dăk Lăk pà git, nhai 4 nam 2021, yal ù tiah Buôn Ma Thuột mùl màl geh Cục gơnoar geh ngui bơta ngăc ngar ai pờ ơnàng broă dong kờl tàm lơgar ai ală phan kơphe coh, bŏ, kơphe klài in. Tŭ do, Sở gam dan mờ UBND càr Dăk Lăk tơlik sră nggal lơh niam wơl kơrnoăt atbồ, ngui nàng di pal mờ sră nggal cih pa. “Kơrnoăt atbồ ngui yal ù tiah kơphe Buôn Ma Thuột den gam lơh niam wơl dơ̆ bàr, kung mờr tus dơ̆ dŭt ndơl bloh, tŭ do gam pơyoa ală mpồl lơh broă gơrềng bal in, cau gơtìp gơrềng bal nàng geh jơnau hơ wơl. Broă gàr niam ngui bơta ngăc ngar do kung là dùl bơta kal ke, tài ờ gơtùi pal tus bal, mơya di lah neh tus bal den pal dờp jăt ală kơrnoăt bơh broă ngui bơta ngăc ngar do. Bè khà măt kă bro, khà măt… tơnơ̆ do kờñ dong kờl den pal dan cih măt. Gam di lah ờ lơh broă bal den ờ duh lơh”.

Nàng geh ngui yal ù tiah Buôn Ma Thuột ai phan kơphe in, ală mpồl lơh sa kă bro, cau dùl nă să lơh is pal di mờ ală khà broă geh ai di jăt mờ kơrnoăt dê. Mơya tàm “broă lơh” phan kơphe tàm drà kă bro tŭ do, kal ke ngan nàng git bơta lơi mùl màl là kơphe bơh Buôn Ma Thuột. Kơphe Buôn Ma Thuột geh tiơng pơnrơ mơya ờ hềt tơnguh geh cồng nha, ờ hềt tơnguh uă bơta kuơ ai cau tam kơphe in. Broă di gơlan geh yal ù tiah kơphe Buôn Ma Thuột “roh” tàm drà kă bro là bơta gŏ loh làng ngan.

Cau cih Minh Huệ-Cau mblàng Ndong Brawl