VOV4.K’ho- Tàm ƀòn dờng Buôn Ma Thuột, càr Dak Lak, Cục lơh sa lơh broă bal mờ Bơtàu tơnguh ƀòn lơgar gơ wèt Bộ Nông nghiệp mờ Phát triển Nông thôn bơyai lơh pơrjum lam lơh kơnòl broă nam 2021 gah lơh sa lơh broă bal mờ bơtàu tơnguh ƀòn lơgar mờ uă broă lơh ai tơlik tàm tơngai kòp Covid-19 ờ hềt geh sền gròi mờ ală Hiệp định kă bro khat gơboh sơn đờm geh lơh jat.

Yal tàm pơrjum, kờp tus jơh nhai 3 nam 2021, gùt lơgar geh mờr 17 rbô 600 hợp tác xã mờ 68 mpồl tam klac hợp tác xã lơh broă tàm gah lơh sa suơn sre. 83% khà hợp tác xã lơh broă geh cồng nha, gơguh 50% pơn drờm mờ nam 2015. Priă lơh geh kờp bal bơh Hợp tác xã lơh sa suơn sre dê geh rlau 380 tơlak đông pah nam. Neh geh 24% khà hợp tác xã lam lơh broă tơrbŏ bal jat ròt bơta kuơ lơh geh, crơng gơs mờr 1 rbô 500 broă lơh tơrbŏ bal mờ rlau 2 rbô 300 phan bơna mờ rlau 3 rbô 200 anih phan lơh gơs jat tơl khà lơh sa niam.

Bulah bè hơ̆, bulah neh geh tam gơl mơya priă lơh geh mờ khà cau geh jơng tàm hợp tác xã lơh sa suơn sre gam dềt mờ rah rài; broă ngui măi mok tàm broă lơh sa suơn sre ờ hềt ring bal; ală broă lơh kuơmàng bè bơcri priă dong kờl phan bơna, ngan là phan bơna drơng lơh sa kă bro, broă lơh ù tiah, càn priă kung gam là ală kòl yan. Geh 2, 3 jơnau đơs đơs là, bơta tờm nàng hợp tác xã bơtàu tơnguh là kòn bơnus, mơya pràn jak đơng lam bồ hợp tác xã dê gam ờ hềt niam. Den tàng, pal sơlơ dong kờl, tơnguh pràn jak atbồ ai mpồl kuang atbồ mờ Chủ tịch Hội đồng quản trị Hợp tác xã in.

Gùt anih pơrjum

Ồng Mai Trọng Dũng, Phó Kuang atbồ Sở Nông nghiệp mờ Phát Triển Nông thôn càr Dak Lak sồr: “Tàm bơtàu tơnguh hợp tác xã gam gơtìp 2, 3 bơta kal ke, tàm hơ̆ geh kal ke bè cau lơh broă, kuang bàng atbồ hợp tác xã gam uă bơta ờ niam. Bulah Chi cục Nông thôn neh geh ală ơdŭ bơto pơlam ai ală cau geh jơng tàm hợp tác xã in, geh ală ơdŭ bơto pơlam ai kuang đơng lam bồ Hợp tác xã in. Bulah bè hơ̆, ờ hềt drơng jat jơnau kờñ geh ai tơlik. Mờr tus bol añ kơp kơnờm geh ală ơdŭ bơto bơtê mờng chài ai kuang atbồ ală hợp tác xã in nàng ală hợp tác xã in git loh ală broă bè bơtàu tơnguh lơh sa mpồl bal nàng lam ală hợp tác xã bơh càr dê bơtàu tơnguh rlau”.

Tàm pơrjum, ală kuang bàng neh iat jơnau yal mờ cribơyai ală tơngume geh: Tơngume bè lơh sa lơh broă bal; rơndap broă prap gàr mờ bơtàu tơnguh ƀòn lơh broă tơngai bơh nam 2021 us nam 2030; yal tơnggit bè phan bơna OCOP; Bơto pơlam quản trị mờ ngui ală công nghệ số tàm broă atbồ dữ liệu hợp tác xã. Ală kuang bàng đơs là, ală bộ, gah broă lơh geh gơ rềng pal pơn jat tai kờp sền, lơh sir adat boh lam, cơ chế, broă lơh bè bơtàu tơnguh lơh sa mpồl bal, hợp tác xã lơh sa suơn sre (ù tiah, dia, càn priă...) di tŭ tă bơsong kal ke, kòl yan, lơh gơlik bơta niam nàng lơh sa mpồl bal, hợp tác xã lơh sa suơn sre in bơtàu tơnguh kơ̆ kơljap. Ngan là tŭ ală Hiệp định kă bro khat gơboh geh lơh jat den bơta bè phan ờdo ờdă, geh bơta niam, gàr tơl kòi phe; tàm pơrlòng phan bơna digơlan gơlik geh pràn ngan. Mờ bơta ƀuơn, bơta pràn he dê, gah lơh sa lơh broă bal bơh ală hợp tác xã, mpồl lơh broă bal geh pơgồp bơnah tơnguh bơta kuơ lơh geh phan bơna he dê.

Bè kơnòl broă tờm nam 2021 dê, Cục lơh sa lơh broă bal mờ Bơtàu tơnguh ƀòn lơgar tơlik jơnau kờñ bơtàu tơnguh lơh sa mpồl bal, hợp tác xã, gơ hòi gơ jà cau lơh broă neh geh bơto bơtê rê lơh broă tàm hợp tác xã, kuơmàng là kuang bàng kơnòm să geh dong kờl priă nhai rê lơh broă tàm Hợp tác xã gàr geh bơh 1 rbô 500 nă tus 2 rbô nă kuang bàng. Lam lơh broă lơh bơto bơtê kuang atbồ Hợp tác xã nàng lơh sră chứng chỉ dà lơgar broă lơh sơn rờp jat tơngume mờ broă lơh bơh Bộ Nông nghiệp mờ Phát triển Nông thôn dê ai tơlik. Dong kờl mờ bơt bơtàu broă lơh jat Kơrnuat sồ 167 tơlik ngai 03/02/2021 bơh Thủ tướng Chính phủ dê ring bal rơndap broă rơ wah, lơh sir, lam lơh uă broă lơh Hợp tác xã pa geh cồng nha tàm ală tiah tàm gùt lơgar tơngai bơh nam 2021 tus nam 2025.

Thứ trưởng Trần Thanh Nam đơs đơng lam tàm pơrjum

Ồng Trần Thanh Nam, Thứ trưởng Bộ Nông nghiệp mờ Phát triển Nông thôn sồr ală tiah pơn jat tai bơtàu tơnguh lơh sa mpồl bal, hợp tác xã jat gùng dà ngui măi mok tàm broă lơh sa, lơh bal tàm broă bơcri priă công nghệ lơh gơlik, bơtàu tơnguh phan lơh gơs bơh suơn sre jat gùng dà uă gah, uă broă lơh gơ jat bal mờ rài lơh sa drà kă bro, tam gơl pa broă lơh sa, kă bro nàng hời rơ hời tơnguh bơta pràn tàm pơrlòng ai phan bơna in: “Bol he tŭ do pal geh dùl nùs nhơm pa, bơtàu tơnguh jat gùng dà lơh sa suơn sre pơgồp bal uă gah, uă broă lơh mờ gơ jat bal mờ broă drơng ala tàm ƀòn lơgar uă ngan hợp tác xã broă drơng ala lơh sa suơn sre. Gùng dà dơ̆ 2 là broă lơh OCOP geh cồng nha ngan den gah broă lơh ƀòn lơgar kung sơn đờm pơgồp bal tàm hơ̆ den tàng bol he pal kơlôi sơnơng nàng tơnguh broă lơh do. Do là kơnòl bơh Cục lơh sa mpồl bal mờ bơtàu tơnguh ƀòn lơgar dê pơgồp bal mờ ală tiah bơt bơtàu broă rơndap lơh jŏ jòng”.

Kung jat Cục lơh sa lơh bal mờ bơtàu tơnguh ƀòn lơgar sơl đơs, nam do geh bơyai lơh bơto bơtê rlau 300 rbô nă cau lơh broă in bơsram broă lơh sa suơn sre nàng kờñ tơnguh bơta niam cau lơh broă drơng jat jơnau kờñ bơtàu tơnguh lơh sa suơn sre phan bơna, broă lơh dờng, tơrgùm bơto bơtê ai cau lơh broă bơtaù tơnguh gah lơh broă ƀòn lơgar in; bơto bơtê ai cau lơh broă tus bal broă lơh tơl xã dùl phan bơna (OCOP); bơto bơtê ai cau lơh broă tàm ală tiah lơh gơlik phan bơna. Bơt bơtàu mờ lam lơh uă 2, 3 broă lơh ngui măi mok ring bal tàm broă lơh sa suơn sre, ngan là 6 broă lơh ngui măi mok ring bal tàm ală gah lơh kòi phe mờ kơphe gam geh lam lơh tàm ală càr Gia Lai, Dak Lak, Đồng Tháp, Kiên Giang, Long An mờ Sóc Trăng. Dong kờl bơtàu tơnguh lơh sa suơn sre, brê bơnơm, phan tàm dà, lơh boh ai cau rƀah in jat gùng dà lơh gơlik phan bơna gơ jat bal mờ tam gơl trồ tiah; lam lơh li la ală broă lơh sa ờ di lơh sa suơn sre, gah broă lơh drơng ala, di mờ bơta geh ngan.

Cau mblàng K’Duẩn