VOV4.K’ho- Ngai 18/6, Bộ Giáo dục mờ Đào tạo bơyai lơh pơrjum pờ tơlik tơn tàm internet gùt lơgar tơn jơh 8 nam lơh jat broă rơndap lơh “Bơt bơtàu mpồl bơtiàn bơsram sră tơngai bơh nam 2012-2020”. Tàm pơrjum, ala mat ală Bộ, gah sơnah lơh broă geh gơrềng mờ ală tiah neh đơs uă bơta mờng chài niam, ală bơta ka ke kòl yan tàm broă lam lơh ală tơngume bơh rơndap broă lơh dê, mơkung đơs ală gùng dà broă lơh nàng broă lam lơh rơndap broă lơh tàm tơngai bơh nam 2021-2030 geh cồng nha mờ geh kuơ rlau tai.

Rơndap broă lơh “Bơt bơtàu mpồl bơtiàn bơsram sră tơngai bơh nam  2012-2020” ai tơlik 4 jơnau kờñ tờm, tơnơ̆ 8 nam lơh jat, geh 2 jơnau kờñ neh lơh sir là: Tơn jơh ờ gĭt sền sră mờ phổ cập giáo dục; mờ jơnau kờñ bơsram sră nàng lơh sir bơta chài kis, bơt bơtàu rài kis dùl nă să is mờ mpồl bơtiàn ngai sơlơ chờ hờp rlau tai. Tơnơ̆ 8 nam lam lơh, rơndap broă lơh neh lơh geh bơta tam gơl tàm bơta gĭt wă bơh ală tiah dê, bơh hơ̆ lơh sir ală broă lơh bơto bơtê tàm ƀòn lơgar bơh kấp hơ đơm nàng lơh jat broă bơsram sră sùm sùm ai tơl nă cau in.

Bộ trưởng Bộ Giáo dục ồng Nguyễn Kim Sơn kung pà gĭt, tàm tơngai tus, Bộ geh kờp sền nàng sền sơwì cồng nha broă lơh bơh ală anih tờm bơto bơtê sùm, anih tờm bơsram sră mpồl bơtiàn, lơh ngan tơl nă cau tus bal bơtàu tơnguh mpồl bơtiàn bơsram sră.

Cau mblàng K’Hạnh