VOV4.K’ho - Nam 2021, kòp Kovid-19 pơn jăt tai gơrềng ờ niam tus mờ broă bơto mờ bơsram bơh gah bơto bơtê mờ bơsram tàm gùt lơgar dê. Uă cau pơgru, kơnòm bơsram gơtìp kòp Kovid-19, ală hìu bơsram pal wàng se, tam cah is jơh cau pơgru bal mờ kơnòm bơsram tơn tàm hìu bơsram... Mờ kơnòl gàr niam gơnoar geh bơsram sră, ală cau pơgru, cau atbồ, kơnòm bơsram ală kấp, cau mè bèp... neh lơh ñgan ờ ngòt glar bòl nàng tam gơl mờ gơdờp mờ broă bơto ndrờm bal tàm bơta pa, gàr niam ờ do ờ dă bơta pràn kơl dang să jan. Broă “Tam gơl nàng gơdờp” tàm broă bơto mờ bơsram neh ai gŏ uă bơta kal ke, gah bơto bơtê mờ bơsram sền wơl, iăt mờ geh uă bơta lơh niam wơl nàng di pal mờ mùl màl, mpồl bơtiàn nàng tus bal dong kờl lơh gơs kơnòl nam bơsram mờ gàr niam bơta niam broă bơto mờ bơsram.

Là nam dơ̆ 2 gùt gah bơto mờ bơsram tàm bơta dơ̆ kòp gơtờp dơ̆ 4 gơtờp pràn rơlao uă ngan pơn drờm mờ nam 2020. Uă tiah lơh jăt broă tam cah ngài mpồl bơtiàn jŏ tơngai, uă hìu bơsram geh ngui nàng lơh tiah tam cah is, sơm kòp. Ală cau pơgru, kơnòm bơsram gơtìp kòp Kovid-19... lơh gơtìp ờ sŭk, ngòt tus mờ kơnòm bơsram bal mờ cau mè bèp. Mơya, mờ broă lơh ngan ờ ngòt tài kòp gơtờp mờ lời kơnòm bơsram ờ “geh bơsram”, gah bơto bơtê mờ bơsram gùt lơgar neh rơcang bơyai lơh bơto mờ bơsram ndrờm bal mờ uă broă lơh, tàm hơ̆ geh: bơto tơn tàm ơdŭ bơsram, bơto pờ tơlik tàm internet, bơto bơh anih sơnđio rùp, ha là jào jơnau bơsram tus tàm hìu. Kuơ màng là gùt lơgar neh lơh gơs bàr dơ̆ pơrlòng bơh dơ̆ pơrlòng jơh bơsram kấp 3 nam 2021 mờ tơn jơh nam bơsram 2020-2021 tàm nùs nhơm chờ hờp mờ ờ sŭk bơh git nđờ tơlăk nă kơnòm bơsram, cau mè bèp gùt lơgar dê: “Ală cau mè bèp mờ ală kòn kung ndrờm geh nùs nhơm ờ sŭk tài mùl màl tàm tơngai do ală kòn ờ geh bơsram tơn tàm ơdŭ bơsram uă, mơya ală kòn neh gơdờp, kung rơcang is, kung lơh ngan tàm broă bơsram sră. Mè bèp den pal rơcang rơlao tus mờ ală kòn, pal sền gròi nền nòn ală kòn rơlao”.

Mŭt tàm nam bơsram 2021-2022, broă rơcang lài bơh gah bơto bơtê mờ bơsram, gơnoar atbồ ală tiah pơn jăt tai geh tơnguh, nàng gàr niam broă bơto bơtê mờ bơsram niam ngan. Tiến sĩ Vũ Thu Hương, ca jăk chài gah bơto bơtê đơs:

Ală tiah mờ bơsram online den broă bơsram neh rơcang rơlao uă ngan. Di lah tàm nam lài den he mìng rơcang gời mờ lơh jăt tơngai tàm nam bơsram. Nam do ală broă neh geh rơcang lài, bơh rơndăp broă sơn đờm mŭt nam bơsram pa, rơndăp broă bơsram, rơndăp broă sền jơnau bơsram, kung bè ală broă lơh tàm nam bơsram ndrờm geh ală hìu bơsram bơyai lơh di gùng mờ di pal ngan. Geh ờ uă tiah geh ală bơta ƀuơn den kung bơyai rơcang ai ală kơnòm bơsram in tus hờ hìu bơsram nàng bơsram tơn, ờ lơh jăt ală rơndăp broă nam bơsram bal gùt lơgar, mờ lơh jăt mờ bơta geh bơh ƀòn lơgar dê.

Nàng geh sùm broă bơto mờ bơsram tàm bơta kòp Kovid-19 gơtìp kal ke, gah bơto bơtê mờ bơsram neh geh ală broă lơh di pal ngan bè broă tơmù tơngu me broă bơto mờ bơsram, bơto sồr, ai geh bè broă bơyai lơh bơto bơsram ndrờm bal mờ tàm broă bơyai lơh pơrlòng jơh bơsram kấp 3... Tàm tơngu me hơ̆, tơl tiah ndrờm geh bơ̆t bơtàu gùng dà bơto mờ bơsram ai kơnòm bơsram in bơh tơl mpồl ơdŭ, di pal mờ broă bơsram sră bơh kơnòm bơsram tàm tiah ờ do ờ dă mờ kơnòm bơsram tàm mpồl F0, ha là gam lơh jăt broă tam cah is. Càr Bắc Giang là tiah sơnrờp ngan bơyai lơh ơdŭ bơsram ndrờm bal. Tàm ơdŭ bơsram do, ală kơnòm bơsram, bơsram tàm internet geh pơgồp bal mờ ơdŭ bơsram gam geh mùl màl tàm hìu bơsram bơh camera geh ơn tàm ơdŭ bơsram. Mò Huỳnh Thị Hoà Bình, Kwang atbồ Hìu bơsram kấp 3 Lạng Giang sồ 1 pà git: “Bol añ ai tơl mpồl ơdŭ geh dùl jơdŭ bơsram pơgồp bal mờ Microsoft Team mờ ai gùng link jơ bơsram hơ̆ ai kơnòm bơsram tàm hìu in. Bơta krơi is bơh ơdŭ bơsram bal do mờ hìu bơsram bơyai lơh là kơnòm bơsram geh bơsram tơn ha là kơnòm bơsram bơsram pờ tàm internet ndrờm gơtùi geh boh bơr bal mờ cau pơgru. Ală kơnòm bơsram bơh tàm phần mềm Microsoft Team den geh boh bơr mờ cau pơgru bơh măi vi tính, ală kơnòm gơlơh bè gam tus bal bơsram bè ờs bơh jơ bơsram hơ̆ dê. Tàm bơta kòp Kovid-19 gam gơtìp kal ke den hơ̆ là dùl broă lơh geh cồng nha nàng ală kơnòm bơsram ờ gơtìp koh gơl broă bơsram sră”.

Jăt Ƀộ trưởng Ƀộ Giáo dục mờ Đào tạo ồng Nguyễn Kim Sơn yal, rơcang sơndră mờ kòp gơtờp tàm nam 2021 pà gŏ, bơta chờ ngan là broă lơh jơh nùs, đềt mềr bơh mpồl rơlao 1 tơlăk nă cau pơgru, ală kwang bàng atbồ dê. Broă bơsram yau mơya tàm bơta bơsram pa, broă bơto pa den tàng ală cau pơgru pal tam gơl pa bơceh lơh, ngui uă phan dong kờl tàm bơta geh bơh internet dê nàng tơlik jơnau ngăc ngar tus mờ ală kơnòm bơsram geh cồng nha ngan.

Tam gơl pa, bơceh lơh nàng gơdờp bal ndrờm bal, mơya geh uă hìu bơsram ờ hềt geh tơl niam phan bơna bè kông nghệ nàng bơto bơsram tơn tàm ơdŭ mờ bơto pờ tàm internet. Uă kơnòm bơsram tàm tiah ngài, tiah gơtìp kal ke ờ hềt geh phan nàng bơsram pờ tơlik tàm internet. Cồng nha broă bơto mờ bơsram tàm ală tiah ờ hềt ndrờm bal tài ngui uă broă bơto bơsram krơi is... Kuơ màng, broă kơnòm bơsram sùm pal tam gơl bơh broă bơsram tơn tàm ơdŭ mờ pờ tơlik tàm internet, ha là bơsram pờ tơlik tàm internet jŏ tơngai neh lơh gơtìp ờ niam tus mờ bồ tơngoh kơlôi sơnơng gơwèt mờ ală kơnòm bơsram dê, bè: gar bòl, gơguh nùs nhơm ờ sŭk, ờ gơtùi boh bơr tơn mờ gơtìp tam cah is mpồl bơtiàn.

Ală kal ke, bơta ờ niam tàm broă bơto mờ bơsram nam bơsram 2021 neh geh Cíñ phủ, gah bơto bơtê mờ bơsram, mpồl bơtiàn gŏ mờ gam rơhời geh ală broă lơh nàng tơmù. Tàm hơ̆ lơh jăt broă lơh “Gùng internet mờ Măi vi tính oh in”, ală tiah neh lam sồr tă priă mờ jào pà git nđờ rơhiang rơbô nơm phan bơsram pờ tơlik tàm internet mờ sim 4G ờ sa priă ai ală kơnòm bơsram geh rài kis gơtìp kal ke, ờ geh phan nàng bơsram tàm internet. Ƀộ trưởng Ƀộ Giáo dục mờ Đào tạo ồng Nguyễn Kim Sơn pà git, geh pơn jăt tai geh ală broă lơh niam wơl, nàng broă bơto mờ bơsram tàm nam 2022 geh cồng nha rơlao: “Bơh 2, 3 dơ̆ lơh niam wơl, tơmù broă bơto mờ bơsram pà gŏ broă bơto mờ bơsram kung gam pal geh ală dơ̆ sền wơl pơn jăt tai, geh bal tàm tơngu me, gùng dà broă bơyai lơh mờ kung là dơ̆ nàng he pal sền wơl jơh gùt broă atbồ mờ gah lơh broă do, bơh ƀộ tus ală hìu bơsram, nàng broă atbồ hơ̆ geh tơnguh bơta pràn rơcang sơndră mờ ală bơta gơtìp”.

Lơh jăt “gơdờp ndrờm bal, ờ do ờ dă” gah bơto bơtê mờ bơsram neh lơh jăt di mờ gùng dà bơh Cíñ phủ dê hơ̆ là gàr niam gơnoar geh bơsram sră tus mờ jơh ală kơnòm bơsram. Mờ broă lơh “jơh ală tài kơnòm bơsram kờñ gơboh in”, rơlao 1 tơlăk nă cau pơgru bal mờ kwang bàng atbồ gah bơto bơtê tàm gùt lơgar gam pơn jăt tai sơrlèt mờ kal ke nàng jơh ală kơnòm bơsram ndrờm geh bơsram mờ bơta niam, tơmù ờ uă ngan ală bơta gơrềng ờ niam bơh kòp Kovid-19 tus mờ broă bơsram sră kơnòm bơsram dê.

Cau mblàng Ndong Brawl