VOV4.K’ho- Bộ Giáo dục mờ Đào tạo pa bơyai lơh pơrjum pờ tơlik tơn tàm internet tơn jơh nam bơsram 2020- 2021 mờ lam lơh kơnòl broă nam bơsram 2021- 2022 gơwèt mờ bơto bơtê kấp dùl. Nam bơsram 2020- 2021 là nam bơsram mờ kấp bơto bơtê kấp dùl geh jơh gùt mpồl bơtiàn sền gròi uă ngan, tài bơh do là nam sơnrờp kấp bơsram do lam lơh jăt broă lơh bơto bơtê bal nam 2018. Bộ Giáo dục mờ Đào tạo neh đơs nam bơh sơnrờp lơh jăt broă lơh, sră giáo khoa pa bơh ơdŭ 1 mờ sồr ală ală hìu bơsram kấp dùl rơcăng lài geh gùng dà bơyai lơh bơto bơtê dipal mờ bơta kòp Covid-19.

Nam bơsram 2020- 2021 là nam bơsram krơi is ngan gơwèt mờ gah bơto bơtê đơs bal mờ bơto bơtê kấp dùl đơs is tŭ dơ̆ sơnrờp jơh gùt lơgar lơh jăt Broă lơh bơto bơtê bal pa gơwèt mờ ơdŭ 1. Bơh sơnđờm nam bơsram tơn, broă lam lơh jăt broă lơh, sră giáo khoa pa gơwèt mờ gah ơdŭ 1 dờp geh bơta sền gròi uă ngan. Jơh ală hìu bơsram kấp dùl tàm gùt lơgar neh ai lài lơh jăt sền gàr khà dùl cơldŭ bơsram ai dùl ơdŭ in. Ồng Hoàng Quốc Tuấn- Kuang ătbồ Sở Giáo dục mờ Đào tạo càr Lạng Sơn, pà gĭt: Kờp sền, rơndăp tăp sèng, rơndăp wơl ơdŭ bơsram, ai lài tơnơ̆ ơdŭ 1 là ơdŭ 2 in, sền gàr tơl ơdŭ dùl cơldŭ bơsram nàng ală oh gơtùi bơsram bàr ƀùi, sền gàr tơngume bơh broă lơh pa dê.

Jăt mò Trần Thị Minh Thu- Kuang ătbồ Phòng Giáo dục Kấp dùl, Sở Giáo dục mờ Đào tạo càr Lào Cai đơs, bal mờ rơcăng lài phan bơna, mpồl cau pơgrru kung neh geh sền gròi, bơto pơlam, sền gàr broă bơto bơtê broă lơh, sră giáo khoa pa. Mò Trần Thị Minh Thu, đơs: Jơnau sồr bơh bol añ dê là, cau pơgru pal ngan ngồn ngac ngar, nhhap nhhar, bơto den pal bơto rơlĕ, nền mờ geh cồng nha. Digơlan ală jơnau ală ùr pơgru tam pà ai ală cau là kơnòm bơsram in nàng bơto di mờ bơta gĭt wă bơh tơl nă cau là kơnòm bơsram dê, bơto tus kàr lơi kơnòm bơsram gơtùi sền mờ gĭt cih tus tềng hơ̆.

Pơrjum tơn jơh nam bơsram 2020- 2021 mờ lam lơh kơnòl broă nam bơsram pa 2021- 2022 gơwèt mờ bơto bơtê kấp dùl

Tàm tŭ tơngai kòp Covid-19 gơbàn kal ke, jơh gùt gah bơto bơtê neh pal lơh jăt jơnau kờñ dơ̆ lĕ bal: lam lơh jăt ală broă lơh rơcăng sơndră kòp ndang mơkung lam lơh jăt Broă lơh bơto bơtê bal nam 2018 gơwèt mờ gah ơdŭ dùl. Sền swì bal cồng nha bơh kơnòm bơsram ơdŭ dùl dê tàm gùt lơgar tàm nam bơsram 2020- 2021 pà gŏ, 41% kơnòm bơsram lơh gơs jak ngan broă bơsram; 15% kơnòm bơsram lơh gơs jak; 41% lơh gơs mờ 15% khà kơnòm bơsram ờ hềt lơh gơs broă lơh bơto bơtê bal. Tàm pơndrờm mờ broă lơh bơto bơtê lài do pà gŏ, khà kơnòm bơsram ờ hềt lơh gơs ndrờm gơ̆p bal. Mơya, khà kơnòm bơsram lơh gơs jak ngan mờ lơh gơs jak broă lơh bơto bơtê pa neh gơguh uă rlau. Ồng Nguyễn Hữu Độ- Thứ trưởng Bộ Giáo dục mờ Đào tạo đơs là, do là bơnàng jă nàng lơh jăt broă lơh bơto bơtê pa gơwèt mờ gah ơdŭ 2 tàm nam bơsram 2021- 2022. Tàm hơ̆, bơta kờñ sền gròi lài ngan là pal bơcri ai mpồl cau pơgru in. Ồng Nguyễn Hữu Độ, đơs: Lời bơta bơcri priă bè mpồl cau pơgru, ală cau pơgru să tờm tơn bơto ngan ngồn jak chài bè broă lơh, broă lơh ờs mờng, geh bơta jơh nùs jơh tồr, kuơmàng là pal geh bơto pơlam bè broă lơh, broă bơto, broă gĭt mờ broă bơto bơtê pa jăt gùng dà bơto bơtê bơtàu tơnguh bơta pràn jak. Do là jơnau kuơmàng nàng lơh nền cồng nha broă lơh tam gơl pa broă lơh bơto bơtê bal.

Bal mờ bơta rơcăng lài mờ bàr pe cồng nha pal cih dờp, nam sơnrờp lam lơh broă lơh bơto bơtê nam 2018 bơh ơdŭ 1, cồng nha mpồl cau pơgru mờ kuang ătbồ gam ờ hềt ndrờm bal, ngan là tàm ală tiah geh rài kis lơh sa- mpồl bơtiàn kal ke uă ir geh bơta ờ ndrờm bal uă ngan pơndrờm mờ ală tiah ƀươn ƀoài. Khà mpồl cau pơgru mờ kuang ătbồ gam ờ hềt tơl tàm bàr pe tiah. Bàr pe tiah tìp kal ke bè bơta dong kờl, priă jền nàng rwah, kĭ sră pơrgon lơh broă mờ cau pơgru; geh tiah kal ke bè cau pơgru nàng rwah bơto. Phan bơna bàr pe tiah ờ hềt lơh geh nàng lơh jăt broă lơh mờ jơnau kờñ drơng broă bơsram ndai. Nam bơsram 2020- 2021, jơh gùt lơgar geh 14 rbô 786 hìu bơsram lơh jăt Broă lơh bơto bơtê bal kấp dùl, bal mờ 16 rbô 323 anih hìu bơsram, bơto bơtê ai mờr 9 tơlak nă kơnòm bơsram in, gơguh rlau 150 rbô nă kơnòm bơsram pơndrờm mờ nam bơsram 2019- 2020.

Bộ Giáo dục mờ Đào tạo neh geh 5 kơnòl broă bal mờ uă broă lơh loh làng ai bơto bơtê kấp dùl in tàm nam bơsram 2021- 2022. Nền cê bè do, pơn jăt tai lam lơh sền gàr bơta niam broă lơh bơto bơtê nam 2018 gơwèt mờ ơdŭ 1, ơdŭ 2 mờ lơh jăt geh cồng nha  broă lơh bơto bơtê nam 2006 bơh ơdŭ 3 tus ơdŭ 5. Tàm tŭ tơngai kòp bơtờp, Bộ trưởng Bộ Giáo dục mờ Đào tạo ồng Nguyễn Kim Sơn, đơs là: nam bơsram tus do, jơh gùt gah bơto bơtê pal tơrgùm jơh ală broă lơh nàng kơryan mờ tơrmù ƀà bơta gơrềng aniai bơh bơto bơtê dê tềng đăp bơta kòp bơtờp. Ai jơh pràn lơh gơs jơnau kờñ cồng nha, sền gàr hìu bơsram ờdo ờdă tềng đăp kòp bơtờp. Ồng Nguyễn Kim Sơn- Bộ trưởng Bộ Giáo dục mờ Đào tạo, đơs: Añ đơs wih đơs wơl là, bol he pal tam gơl jơnau bơh rài bơto bơtê dê, mơya bơta kuơmàng là tam gơl jơnau là tam bơta lơi, tam gơl bè lơi, tam gơl nàng lơh bơta lơi? Bol he tam gơl jơnau tus dùl jơnau bè ờs pa, ală tiah mờ ờ bè ờs tàm broă tam dră mờ kòp den tam gơl jơnau ờ bè ờs pa. Tam dră mờ kòp, bơsong bơta gơrềng ờ niam bơh kòp dê.

Pơn jăt tai geh broă rơndăp lơh, gùng dà rwah, bơto bơtê nàng geh tơl cau pơgru, sền gàr cồng nha bơto bơtê

Bộ Giáo dục mờ Đào tạo kung sồr ală tiah pal geh broă rơndăp lơh kờp sền wơl khà kơnòm bơsram tam gơl tài bơh gơrềng bơh kòp bơtờp dê. Bal mờ bơta niam kờñ pal sền gròi tus broă dong kờl ală kơnòm bơsram lòt bơsram, ngan là tŭ mờ broă lơh sa bơh ală hìu bơnhă dê gơtìp gơrềng tài bơh kòp Covid-19. Kuơmàng, lơh uă ală broă lơh bơyai lơh bơto bơtê nàng bơsong, tam dră wơl mờ bơta gơrềng bơh kòp Covid-19 dê. Rơcăng lài geh ală gùng dà, broă rơndăp lơh loh làng nàng bơyai lơh bơto bơtê dipal mờ bơta gơbàn bơh kòp bơtờp dê mờ bơta tơl pràn lơh geh bơh hìu bơsram dê kung bè bơta geh ngan bơh cau bơsram dê.

Jăt VOV1- Cau mblàng Lơ Mu K’Yến