VOV4.K’ho- Hìu bơsram Phổ thông kòn cau ơm sa ngai kấp bàr Krong tàm tiah sar lơgar ngài ngan xã Krong, kơnhoàl Kbang, càr Gia Lai. Bal mờ broă bơto sră, ală pơgru tàm do gam ngui bơta kờñ gơboh nàng hòi jà kơnòm bơsram cau jơi bơtiàn kòn cau dùl êt nă cau lòt bơsram.

Pa àng drim gờñ ngai dơ̆ bàr bồ poh, ală pơgru tàm Hìu bơsram Phổ thông Kòn cau ơm sa ngai Kấp bàr xã Krong neh guh bĭc soh àu ram, soh tai dùl blah àu mìu nàng lòt tus ƀòn Tung Gút, ơm ngài mờ hìu bơsram pơgăp 10 kơi sồ nàng jòi kơnòm bơsram. Tus hờ bồ ƀòn, bi Đinh Uýt là Kuang ătbồ thôn Tung Gút neh ơm kơ̆p bơh lài, bal mờ ală pơgru tam pà gơs tơl mpồl tus tơl hìu nàng hòi jà ală oh lòt bơsram wơl. Mờr 7 jiơ drim, neh geh 6 nă kơnòm bơsram tàm tê ià kơldung àu mpha nggui đah ngkời rơndeh măy ală pơgru dê nàng rê wơl hờ hìu bơsram. Kuang ătbồ thôn Tơng Gút bi Đinh Uýt pà gĭt: Dơ̆ do là dơ̆ bàr añ neh bal mờ ală pơgru nàng hòi jà ală kơnòm bơsram rê wơl hờ hìu bơsram, tŭ den pơgồp bal mờ ƀan ngàñ, mpồl cau, đảng viên tàm ƀòn pơgồp bal tai nàng ală oh lòt tus ơdŭ. Geh tŭ pơrjum mblàng yal tàm ƀòn, geh tŭ pơgồp bal mờ mè bèp tơngkah oh kòn, kòn sau lòt tus hờ hìu bơsram tus hờ ơdŭ, pơgồp bal mờ pơgru hòi jà tŭ trồ mang.

Là dùl tàm ală pơgru kơnòm să ngan rlau jơh bơh hìu bơsram dê, klau pơgru Nguyễn Quốc Triều yal wơl, uă dơ̆ bi mờ ală pơgru gơtìp hư rơndeh tàm gùng, gơpừ tơn tàm gùng, àu mpha klềp bŏ bil ù jù mung jơh lơm. Klau pơgru Nguyễn Quốc Triều yal: Tàm tơngai lơh broă 4 nam den tàm tơngai sơnrờp là bòl glar ngan, gơl gùng lòt kal ke. Añ kơlôi tus kơnòm bơsram bơh añ dê kờñ ngan ală akhar den tàng añ pal lơh ngan nàng dong kờl ală oh tàm tiah sar lơgar ngài nàng ală oh in geh bơsram ală akhar, ală jơnau gĭt wă pa nàng lơh phan gùng lòt jăt bal tàm să ai ală oh in gĭt tàm broă ơm kis lơh lòt tơnơ̆ do.

Ală pơgru lòt hòi kơnòm bơsram lòt bơsram wơl bơh àng drim gờñ

Ơm ngài mờ anih tờm kơnhoàl Kbang rlau 40 kơi sồ, Hìu bơsram Phổ thông Kòn cau ơm sa ngai kấp bàr Krong gơ ơm tàm gùl bă ù gùt dar là kơh bơnơm lơm. Hìu bơsram do neh geh lơh pơgăp mờ do rlau 17 nam, tŭ do geh 14 nă pơgru, bal mờ 322 nă kơnòm bơsram, uă ngan là cau Bahnar. Pơgru Phan Danh- Phó Kuang ătbồ Hìu bơsram pà gĭt, tơngai lài, tŭ kòp Covid-19 ờ hềt lơh bơtờp, kơnòm bơsram ờ tơl bơta bơsram tơn bơh tàm internet, ală pơgru pal cih sră bơsram cèng tus tơl ƀòn ai ală oh in. Bơh gùl nhai 11 do, kơnòm bơsram pơn jăt tai tus wơl hờ hìu bơsram nàng bơsram tơn. Mơya, khà kơnòm bơsram ơm rlô bơsram uă, pơgru pal lòt hòi jà tai ală oh tus hờ hìu bơsram. Pah dơ̆ lòt hòi jà là dùl dơ̆ bòl glar kal ke ngan. Klau pơgru Phan Danh, yal: Bơta gĭt wă bơsram is bơh ală oh dê ờ hềt uă, geh bal mè bèp kơnòm bơsram dê cau kung ờ kờñ ai oh kòn he dê in lòt bơsram tài bơh tŭ do, kơnòm bơsram kấp bàr ală oh neh dờng, neh gĭt lơh broă mờ hìu bơnhă sền ală oh là cau lơh broă tờm tàm hìu bơnhă. Bàr pe nă cau krơi is den mè bèp kơnòm bơsram ờ pà lòt bơsram. Bàr pe nă oh ndai den oh mi lòt hòi jà, mè bèp kơnòm bơsram dê cau sơ il nùs ngan, cau gam bơtrơh mờ lơh pờng tai cau pơgru den tàng broă lơh hòi jà là kal ke ngan. Dilah mờ gŏ kơnòm bơsram lòt tus wơl hờ hìu bơsram ờ hềt kơ̆ kơl jăp den hìu bơsram pal tơrgum ală pơgru tơn bơh mho ngai rlô nàng tus mang ngai rlô mờ drim ngai dơ̆ bàr ală pơgru pal lòt lơh broă lơh hòi jà.      

Gùng lòt tus hờ hìu bơsram bơh ală pơgru pơdich pơdar, bòl glar ngan  

Sơrlèt gan ală kal ke, ală pơgru tàm Hìu bơsram Phổ thông Kòn cau ơm sa ngai kấp bàr xã Krong kung gam jơh nùs ngan kờñ gơboh sùm ală kơnòm bơsram he dê, jơh nùs jơh tồr sùm mờ broă lơh. Digơlan bơta chờ hờp dờng ngan rlau jơh bơh ală pơgru tiah do dê là ală kơnòm bơsram ờ sơrbì hìu bơsram, ờ sơrbì ơdŭ, nàng rài tơnơ̆ do ờ gam tai gơbàn wih gơbàn wơl sùm mờ bơta jơgloh rƀah.

         Cau cih Hoàng Qui- Cau mblàng Lơ Mu K’Yến