Ală ngai lồi nhai 3 do, bol añ neh tus wơl tàm bă brê 704, bơnah brê Công ty Lâm nghiệp Ea Kar, gơwèt xã Cư̆ Bông, kơnhoàl Ea Kar. Tàm do, ală bă brê ndrờm neh gơtìp mus kơl, chu aniai uă ngan bơh nam 2020 mờ bol añ neh yal, mờ ndrờm neh gơs bă ù tam bùm blàng. Ală bă ù tam bùm blàng pơn jăt bal sền ờ mpờl ù tiah tai. Bơrlŭ bal tàm tiah tòm bùm blàng là ală tòm chi brê ờ hềt ồs sa jơh, gam tơn pừ lềng làng. Tòm bùm blàng tàm do neh ñhoa rơlao mờ bồ cau, kờp dŭ neh tam geh mờr 1 nam, rơcang tơnhào.

                                                      Jơh dùl bồ dòr neh gơtìp chu bơh nam lài

Dùl nă kuang bàng Công ty lâm nghiệp pà gĭt, broă mus kơl aniai brê tàm do gơbàn sùm tàm uă nam mờ tŭ brê gơtìp mus kơl là gơtìp tam gơl gơs ù lơh sa. Broă kơrian ală cau mus kơl aniai brê nàng geh ù lơh sa gơtìp kal ke ngan. Tàm do, ală cau neh ngui broă lơh pa, ờ ai rơnđòt òt chi, mìng broă chu bơh 1 tus 2 nam hơ̆ sồng tùc, tam, kal ke ngan nàng gĭt broă mus kơl aniai brê mờ kung kal ke ngan nàng kơrian làng bol tùc tam tàm bă ù neh gơtìp mus kơl aniai do: “Tiah do den gơtìp sơgràm mờ tam rơhời, bè tàm tiah geh ală chi neh ro ne, ồs sa là gơtìp chơ̆t den cau lơh mìr tơn. Bùm blàng do là neh tam 1 nam bloh, rơcang tơnhào bloh. Bơta do bol añ neh yal. Lài do geh lơh jăt gùng dà broă lơh sơbì phan tam do, mơya tŭ yal mờ kơnhoàl, ờ hềt geh kơrnoăt tài di lah sơbì den bơh cấp kơnhoàl rơlao hờ đang hơ̆ sồng gơtùi, gam bol añ lơh den ờ gơtùi. Làn bol chu ờ duh mờ broă mus kơl, bè hơ̆ gam di pơgăp 3 nhai tai là tiah tiah brê do”.

Là tiah geh uă bơta mus kơl brê nàng geh ù lơh sa, ồng Bùi Quốc Tuấn, kuang atbồ Công ty Lâm nghiệp Krông Bông pà gĭt, broă mus kơl aniai brê tàm bơnah brê công ty pah nam sơlơ gơtìp kal ke rơlao, mờ ală nhai bồ nam do là geh uă ngan. Broă mus kơl aniai brê bơh ală cau ngai sơlơ uă, ngòt rơngơ̆t ngan, kal ke ngan nàng kờñ gàr geh brê. Bơta ờ sŭk ngan rơlao là bơnah brê bơh công ty rềp mờ tiah Dà lơgar gam lơh jăt broă lơh ƀòn ơm kis pa bơh tơnao dơng dà Krông Păc thượng.

                                                              Brê gơtìp chu aniai tàm nam 2020

Rơlao 700 hìu làng bol mờ mồr 4 rơbô nă cau mìng là làng bol kòn cau bơh tiah đah tô dà lơgar ntrờn tus tàm tiah rềp mờ brê. Broă atbồ, sền gàr gơs kal ke di lah ờ geh ală broă lơh ring niam broă lơh sa làng bol in: “Khà dơ̆ mus kơl aniai brê tàm bơnah brê bơh công ty ngai sơlơ gơguh, nam 2019 gơtìp 114 dơ̆, nam 2020 là 204 dơ̆ mờ kuơ màng là 2 nhai bồ nam 2021 do geh tus 94 dơ̆ mus kơl aniai brê mờ kơl chi ờ di mờ adăt boh lam. Broă mus kơl pa là mus, òt ală tòm chi dềt, tus tàm kàl prang dờng den chu lơh ală tòm chi dờng kung chơ̆t sơl”.

Bal mờ ală kơnhoàl Ea Kar, Krông Bông, broă mus kơl aniai brê nàng kờñ geh ù lơh sa kung gơtìp uă tàm kơnhoàl Ea Súp sơl tàm bơta ờ jai sền gàr bơh cau tờm brê dê.

Ồng Nguyễn Văn Quyết, kuang atbồ Công ty TNHH HTV lơh phan sa mờ brê bơnơm càr Dak Lak pà gĭt, mìng is tàm nam 2020, tàm bơnah brê công ty dê geh rơlao 31 lồ brê neh gơtìp mus kơl mờ sơgràm ù. Ală cau mus kơl do iơh bơsăk, khin bơrnañ ngan, mơya broă lơh glài ală cau do ờ pràn, ờ nền nòn, den tàng lơh gơtìp aniai brê ngai sơlơ uă rơlao: “Ală cau mus kơl sơgràm ù brê khin, iơh bơsăk ngan, tŭ lơi kung rơcang tam dră wơl mờ mpồl sền gàr brê bơh công ty dê. Ală dơ̆ tam lơh, pơhìn mờ lơh aniai phan bơna, ală anih sền gàr brê bơh công ty den neh pơyoa sră tus mờ ală anih lơh broă geh gơnoar, mơya tus tŭ do kung gam ờ hềt geh bơsong sơl. Kuơ màng là ală dơ̆ sơgràm ù lơh hìu, lơh anih lơh broă tàm bă ù công ty kung neh gơbàn uă ngan”.

                             Tàm bơrlŭ bal mờ tòm bùm blàng là tòm chi gam gơpừ uă ngan tàm bă mìr

Bơta ờ sŭk ngan rơlao tàm càr Dak Lak tơngai pa do là broă mus kơl aniai mờ sơgràm ù brê ờ mìng nàng lơh sa bè ờs mờ gam geh tơngŏ bơta geh mpồl lơh broă, geh broă lơh bal. Geh ală cau kờñ blơi uă ù brê nàng tăc, pơrlồm làng bol ờ gĭt wă. Broă kă bro ù brê sơgràm ờ di mờ adăt boh lam sơlơ lơh broă mus kơl aniai brê tàm ală kơnhoàl geh uă brê bè Ea Súp, Ea Kar, Krông Bông gơtìp kal ke rơlao.

Ồng Ngô Văn Thắng, Phó Chủ tịch UBND kơnhoàl Ea Súp pà gĭt, kơnhoàl gam bơyai lơh tam dră, jòi kŭp mờ kơrian bơta cau tìs pa, ngòt rơngơ̆t ngan do: “Ờ mìng geh nùs nhơm sơgràm ù ờ di mờ adăt boh lam, mờ gam geh bơyai lơh kă bro, pơrlồm tai. Ală làng bol bơh tàm tiah ndai tus mờ ờ hềt gĭt loh làng ù tiah bè lơi den gơtìp ală cau do pơrlồm ai blơi mờ hơ geh lơh sră dờp gơnoar ngui ù tàm ală bă ù do. Tàm broă lơh jăt kơnòl den ală mpồl trinh sát, ală anih lơh broă, tàm hơ̆ uă ngan là anih lơh broă kuang àng gĭt ală bơta neh yal uă ngan tus mờ Huyện uỷ, UBND kơnhoàl”.

Jăt jơnau bơh Sở NN mờ PTNT càr Dak Lak yal, kờp bơh bồ nam 2021, geh mờr 20 rơbô lồ brê bơh ală công ty lâm nghiệp, di pơgăp 5 rơbô 400 lồ brê bơh ală rơndăp broă lơh sa suơn sre brê bơnơm mờ tàm hơ̆ uă ngan là rơlao 25 rơbô lồ brê geh UBND cấp xã atbồ neh mờ gam gơtìp sơgràm ờ di mờ adăt boh lam. Broă sơgràm ù brê tàm càr Dak Lak gam gơtìp uă ngan mờ sùm gơguh tàm ală nam pa do.

Ồng Nguyễn Hoài Dương, Kuang atbồ Sở NN mờ PTNT càr Dak Lak đơs là, bal mờ bơta pràn ờ geh bơh cau tờm brê den broă brê gơtìp sơgràm aniai geh tơngu me tờm uă ngan bơh cơ chế, broă lơh. Bơta pràn bơcri priă ai broă atbồ, sền gàr brê tŭ do ờ uă ngan, rài kis kuang bàng, cau lơh broă sền gàr brê ờ hềt tơl, tàm tŭ kơnòl den geh uă ngan: “Añ đơs là, pal sền wơl mờ tơnguh rơlao tai ală bơta pràn bơcri priă ai broă atbồ sền gàr brê hòn is in. Brê hòn is tŭ do jơh ală ndrờm là ờ geh ai lơh den kơnòl bơh Dà lơgar pal bơcri priă ai broă atbồ, sền gàr in. Bơcri priă tàm do là pal bơcri priă di pal mờ broă gơtùi gàr geh brê, di lah ờ den he đơs mìng dong kờl mờ gam kàr lơi den cau tờm brê drơng, den brê ờ gơtùi sền gàr. Bơta ndai tai, pal lơh glài nề n nòn ală cau lơh tìs, cau sơgràm ù brê, kă bro ù brê”.

Neh 5 nam bơh tŭ Thủ tướng Chính phủ geh jơnau đơng lam til mpồng brê mờ lơh jăt ală broă sền gàr, tơnguh wơl brê hòn is. Mơya, tàm càr Dak Lak pà gŏ, kơnòl sền gàr brê gam glar bòl ngan tềng đăp mờ broă sơgràm tam phan, ờ mìng bơh làng bol mờ gam geh ală cau pa tai, ală cau kă bro ờ di mờ adăt boh lam geh tơngŏ, geh mpồl lơh broă bal. Tàm tŭ bơta pràn nàng ai broă atbồ, sền gàr brê gam ờ uă, ală cau tờm brê kung pà gŏ broă lơh ờ pràn, uă cau tờm brê gam ờ sền gròi tàm broă atbồ, lơh gơtìp broă mus kơl aniai brê ngai sơlơ gơtìp kal ke tàm broă sền gròi.

Cau cih Công Bắc-Cau mblàng Ndong Brawl