VOV4.K’ho - Uă nam pa do, ală pang sră cih bơh broă yal tơngit “Bal mờ oh lòt bơsram” geh Kes priă Sền gàr mờ tơnguh bơtàu brê càr Kon Tum lơh jăt tàm bồ nam bơsram pa neh dong kờl ală kơnòm bơsram, tàm hơ̆ uă ngan là tàm tiah làng bol kòn cau, tiah ngài gơtìp kal ke tàm càr in geh sră cih. Ờ mìng bè hơ̆, ală pang sră cih do gam cèng geh jơnau tơlir lơh jăk broă tơm priă sền gàr tiah kis brê nàng sền gàr mờ tơnguh bơtàu brê kơl jăp mờ tơnguh rài kis broă lơh sa ai làng bol in.

Hìu bơsram Cấp 1 Nguyễn Văn Cừ, tàm xã kal ke Đăk Pxi, kơnhoàl Đăk Hà geh 275 nă kơnòm bơsram ndrờm là oh kòn làng bol kòn cau Xơ dăng dê lơm. Lài mờ nam bơsram pà 2021-2022, Mpồl atbồ hìu bơsram neh tam pà cau pơgru tus tơl hìu kơnờm bơsram tam 3 ƀòn: Đăk Kơ Đương, Đăk Rơ Wang mờ Đăk Wét sền mùl màl rài kis kơnòm bơsram. Cồng nha pà gŏ geh uă kơnòm bơsram ờ tơl sră cih, sră măi bal mờ ào mpha nàng lòt bơsram. Bơta chờ tus mờ cau pơgru bal mờ kơnòm bosram cấp 1 Nguyễn Văn Cừ tŭ geh jơnau yal bơh Kes priă sền gàr mờ tơnguh bơtàu brê càr Kon Tum pơn jăt lơh jăt broă yal tơngit “Bal mờ oh lòt bơsram” pà tơl nă kơnòm bơsram 7 pang sră cih geh cih jơnau yal sền gàr brê mờ lơh jăt broă tơm priă sền gàr tiah kis brê tềng pang sră cih. Pơgru Nguyễn Trung Dũng, Kuang atbồ hìu bơsram pà git: “Khà sră cih geh pà tơl ai ală kơnòm bơsram bơh ơdŭ 1 tus ơdŭ 5 tàm jơh 1 nam bơsram. Bè bơta niam pơ-àr kung bè ală jơnau yal den geh cih loh làng, nền nòn pơgồp bal tàm broă bal mờ hìu bơsram chồl pràn broă bơto bơtê ală kơnòm bơsram tam gơl tàm broă lơh, jơnau git wă. Bơh ală jơnau tơngit, ală tơngu me mờ Kes priă sền gàr tiah kis brê neh ai gŏ tàm hơ̆ kung bal mờ hìu bơsram bơto ală kơnòm bơsram gơboh mờ ù tiah geh is, git sền kuơ ù tiah geh is mờ git sền gàr tiah kis bơh să tờm, geh lơh mpồl bơtiàn tam gơl jơnau git wă nàng lơh niam broă sền gàr mờ tơnguh bơtàu brê tàm ƀòn lơgar”.

Hìu gal oh mi lòt bơsram, geh pà sră cih bơh broă yal tơngit “Bal mờ oh lòt bơsram”, oh Y Thị Thư, kòn cau Xơ đăng, bơsram ơdŭ 4A pà git, kơnờm mờ hơ̆, den tàng mè bèp oh ờ pal rơcang blơi sră cih ai ală kòn in nàng prăp priă ngui tàm broă ndai. Oh kung gŏ gơboh mờ ală pang sră cih do: “Oh mờ ală bơyô geh pà sră cih do nàng cih jơnau bơsram, oh gơlơh chờ hờp ngan. Oh sền tàm pang sră cih do oh gŏ gơboh mờ ù tiah geh is ngan”.

Lơh jăt broă lơh yal tơngit “Bal mờ oh lòt bơsram”, lài mờ nam bơsram pa 2021-2022, Kes priă sền gàr mờ Tơnguh bơtàu brê càr Kon Tum neh jun tus 169 hìu bơsram tàm 76 xã, thị trấn tàm 10 kơnhoàl, ƀòn dờng tàm càr mờ 600 rơbô pang sră cih ai kơnòm bơsram mờ 5 rơbô nơm sơgơn nàng pà ai kơnờm bơsram in. Tềng pang bơdìh sră cih mờ sơgơn ndrờm geh cih ală jơnau yal bè broă tơm priă sền gàr tiah kis brê mờ sền gàr brê. Broă lơh do geh dong kờl ală kơnòm bơsram geh sră cih mờ di pal mờ broă kờñ geh jơnau tơngit tàm broă lam sồr tus jơh ală làng bol kis tàm ƀòn lơgar tàm tiah geh ai broă sền gàr tiah kis brê. Ồng Phan Thế Vinh, Chủ tịch UBND xã Hiếu, kơnhoàl Kon Plông pà git: “Bồ nam bơsram ală nam Kes priă ndrờm dong kờl sră cih ai ală kơnòm bơsram in nàng pơgồp bal tàm broă ai bơtơl ƀuơn ală kơnòm bơsram in tàm broă bơsram sră. Sră cih bơh Kes priă pà ai ală kơnòm bơsram in tàm tiah làng bol kòn cau, tiah kal ke geh cih jơnau tơngit. Tàm tơngu me jơnau tơngit hơ̆ hìu bơsram kung neh lam sồr kơnòm bơsram bè broă sền gàr brê. Bơh ală kơnòm bơsram den cau mè bèp kơnòm bơsram kung git bè jơnau tơngit do, tơnguh uă nùs nhơm atbồ sền gàr brê tàm xã”.

Jăt ồng Hồ Thanh Hoàng, Kuang atbồ Kes priă Sền gàr mờ Tơnguh bơtàu brê càr Kon Tum yal, ală nam bơsram lài, Kes priă ndrờm pơgồp bal mờ Mpồl kuang atbồ ală hìu bơsram bơyai lơh jào pà sră cih mờ sơgơn pơgồp bal tàm broă lam sồr bè broă tơm priă sền gàr tiah kis brê nàng tơnguh uă jơnau git wă bơh ală kơnòm bơsram. Mơya, tàm nam bơsram do, tài gơrềng bơh kòp Covid-19, mpồl lơh broă do ờ lơh jăt rơndăp broă bè lài neh geh ai mờ ai cau bal mờ rơndeh pơn diang sră cih, sơgơn tus tơl hìu bơsram, jào Mpồl kuang atbồ hìu bơsram in nàng pà ală kơnòm bơsram. Bŭ lah gơtìp gơrềng bơh kòp Cobid-19, broă lam sồr “Bal mờ oh lòt bơsram” geh Kes priă sền gàr mờ Tơnguh bơtàu brê càr Kon Tum bơyai lơh gam pơn jăt tai geh uă jơnau kờñ gơboh mờ jơnau tơngit, lơh jăt niam broă tơm priă sền gàr tiah kis brê nàng sền gàr mờ tơnguh bơtàu kơl jăp mờ tơnguh rài kis broă lơh sa ai làng bol in.

Cau cih Khoa Điềm-Cau mblàng Ndong Brawl