VOV4.K’ho - Broă lơh “gùng internet mờ măi tính oh in” geh Chính phủ lam sồr neh mờ gam lơh jăt niam tàm càr Dăk Lăk mờ broă tus bal, dờp bal bơh uă cấp, gah lơh broă bal mờ mpồl lơh sa kă bro, cau geh nùs nhơm niam. Bơh dùl nhai nggùl lơh jăt, broă lơh do neh tă geh priă bal mờ phan geh rơlao 5 tơmàn đong. Bơh tŭ hơ̆ geh pơgồp bal dong kờl uă hìu nhă geh rài kis kal ke tàm tiah ngài in bơsong bơta kal ke bè phan bơsram, gùng internet ai oh kòn in bơsram pờ tơlik tàm internet tàm bơta kòp Covid-19 tàm càr gam uă kal ke.

Ntào kơ̆p lơh sră nàng dờp sim data ờ sa priă bơh đah điện thoại Vinaphone geh VNPT kơnhoàl Cư̆ Mgar dong kờl tơn tềng hìu bơsram kòn ùr dê, bi Y Rít Kbuôr, dùl hìu geh rài kis kal ke tàm ƀòn Sút Mđưng, xã Cư̆ Suê pà git, broă dong kờl do geh kuơ màng ngan.

                            Công ty điện thoại tus tơn tàm hìu bơsram nàng dong kờl sim data ờ sa priă

Hìu nhă bi geh bàr nă kòn gam bơsram cấp 1 mờ cấp 2, ndrờm bơsram pờ tơlik tàm internet lơm, tài bơta kòp Covid-19 gam kal ke. Hìu nhă bi ờ tơl nàng lơh internet, di lah tă priă điện thoại nàng mờ 3G, 4G ai ală kòn in bơsram pờ tơlik tàm internet den roh uă ngan priă, kal ke ngan gơtìp mờ hìu rơƀah bè bi dê. Mờ sim ờ sa priă geh bơta pràn uă geh dong kờl, nùs nhơm ờ sŭk bè gùng internet ai oh kòn in bơsram pờ tơlik tàm internet bơh hìu nhă bi neh geh bơsong: “Dùl nă bơsram ơdŭ 7, dùl nă gam dềt bơsram ơdŭ 1. Geh cau bơsram ƀùi drim, geh cau den bơsram ƀùi mho. Kung bơsram tàm điện thoại lơm, añ pal lơh ngan mơ. Ưn ngài VNPT neh dong kờl, dong kờl làng bol kis tàm tiah ngài, nàng oh kòn geh bơsram online”.

Mò Nguyễn Thị Bích Ngọc, Kuang atbồ hìu bơsram cấp 1 Lê Thị Hồng Gấm, xã Cư̆ Suê, kơnhoàl Cư̆ Mgar pà git, mờ bơta krơi is tàm tiah ngài, tiah làng bol kòn cau, geh uă ngan hìu nhă gơtìp kal ke mờ gùng internet ai kòn in bơsram sră. Tàm tŭ hơ̆, bơta kòp gơtờp tàm xã gam kal ke, broă bơsram pờ tàm internet di gơlan gam jŏ. Broă dong kờl sim data ờ sa priă bơh gah lơh internet bè VNPT, Viettel ai cau mè bèp kơnòm bơsram bal mờ cau pơgru in neh dong kờl kuơ màng ngan tàm broă bơto mờ bơsram sră hìu bơsram dê: “Do là broă dong kờl kuơ màng ngan, tài jơh ală kơnòm bơsram ndrờm kal ke, gùng internet nàng bơsram ờ pràn. Den tàng broă dong kờl do là niam ngan ai ală kơnòm bơsram in tàm broă bơsram pờ tàm internet , mờ kung ai tơl bơta niam nàng cau mè, bèp kơnòm bơsram in, tài cau mè bèp kis tàm do ndrờm gơtìp kal ke lơm”.

            Gam rơlao 400 rơbô nă kơnòm bơsram tàm càr Dăk Lăk gam bơsram pờ tơlik tàm internet

Là dùl tàm ală mpồl lơh sa kă bro lam lài tàm broă lơh jăt broă lơh “gùng internet mờ măi tính oh in” tàm càr, ồng Trịnh Văn Dũng, Phó kuang atbồ đah kă bro VNPT Dăk Lăk pà git, bơh Sở Giáo dục mờ Đào tạo, công ty do neh dong kờl priă mờ phan rơlao 1 tơmàn đong. Bal mờ hơ̆, công ty neh bơtơl ală anih pờ tơlik internet nàng tơl internet ai kơnòm kis tàm tiah ngài in bơsram sră pờ tàm internet. Mờ tàm ală anih lơh broă tàm kơnhoàl kung bơyai lơh dong kờl sim data sơl, dong kờl khà priă ờ sa priă jăt mờ broă lơh mùl màl: “Kòp covid-19 gam gơtìp kal ke bè tŭ do, den jơh ală hìu bơsram tàm càr ờ hềt gơtùi lòt bơsram tơrgùm bal. ală oh kòn gam pal bơsram bơh broă lơh pờ tơlik tàm internet mờ tàm khà hơ̆ den geh uă ngan hìu nhă ală kơnòm bơsram gơtìp kal ke, ờ geh điện thoại, ờ geh gùng internet nàng gơtùi bơsram sră. Bơh bơta do, ring bal mờ sở Giáo dục - Đào tạo, VNPT neh bơyai lơh khà dong kờl geh măi tính ƀảng bal mờ sim adat, khà dong kờl do geh 1 tơmàn đong”.

Jăt khà kờp bơh Sở Giáo dục mờ Đào tạo càr Dăk Lăk yal, tơnơ̆ mờ dùl nhai nggùl lơh jăt broă lơh “gùng internet mờ măi tính oh in”, tus tŭ do gùt càr neh dờp geh khà dong kờl priă bal mờ phan geh rơlao 5 tơmàn đong. Tàm hơ̆, mìng is kuang bàng, cau lơh broă tàm công đoàn gah lơh broă do neh tă pơgồp geh khà priă di pơgăp 4 tơmàn đong ai kes priă “măi tính oh in”. Khà priă gam tai geh ală mpồl lơh sa kă bro, cau geh nùs nhơm niam dong kờl. Ồng Đỗ Tường Hiệp, Phó kuang atbồ Sở Giáo dục mờ Đào tạo càr Dăk Lăk pà git, priă mờ phan neh tă geh geh jun tus ală phòng Giáo dục in. Ai bơh tàm bơta mùl màl, ală phòng geh blơi phan bơsram pà ală kơnòm bơsram geh rài kis gơtìp kal ke gơwèt hìu rơƀah, hìu ndrờm mờ rơƀah, kơnòm bơsram gơtìp kal ke tài bơh kòp Covid-19. Tŭ do broă lơh do gam pơn jăt tai lam sồr tă pơgồp nàng hòi jà jơh gùt mpồl bơtiàn tus bal: “UBND càr neh đơng lam Sở Giáo dục mờ Đào tạo lơh rơndăp broă nàng lam sồr gùt mpồl bơtiàn, ală anih lơh broă, mpồl lơh broă gơrềng bal tàm mpồl lơh broă chính trị kung bè làng bol tàm càr Dăk Lăk tus bal dong kờl, tă priă dong kờl gah bơto bơtê mờ bơsram ai ală kơnòm bơsram gơtìp kal ke, là ală kơnòm bơsram rơƀah, kơnòm bơsram gơtìp gơrềng tài bơh kòp Covid-19 di gơlan geh măi tính, phan bơsram pờ tơlik tàm internet niam ngan, gàr niam broă ơm ờ tus hờ hìu bơsram mơya ờ ơm broă bơsram sră”.

Gùt càr Dăk Lăk tŭ do geh rơlao 400 rơbô nă kơnòm bơsram ală cấp bơsram, tài bơta kòp Covid-19 gơtìp kal ke, kơnòm bơsram gùt càr gam pal bơsram pờ tơlik tàm internet. Mơya, jăt khà kờp bơh gah bơto bơtê mờ bơsram yal, geh tus rơlao 67 rơbô nă kơnòm bơsram ờ geh phan bơsram, gùng internet nàng bơsram pờ tơlik tàm internet, ală kơnòm bơsram do ndrờm gơtìp tàm ală hìu nhă rơƀah, ndrờm mờ rơƀah kis tàm tiah ngài. Broă dong kờl bơh ală cấp, ală gah bal mờ ală mpồl lơh sa kă bro, cau geh nùs nhơm niam bơh broă lơh “gùng internet mờ măi tính oh in” gam cèng geh bơta chờ ai uă kơnòm bơsram kis tàm tiah ngài in, dong kờl broă bơto bơtê mờ bơsram geh ƀuơn rơlao.

Cau cih Công Bắc-Cau mblàng Ndong Brawl