VOV4.K’ho - Drim òr (29/10), tàm Hà Nội, Bộ Kế hoạch mờ Đầu tư neh bơyai lơh “Pơrjum lơh jăt broă lơh jŏ jòng dà lơgar dê bè broă tơnguh tơlir tơngai bơh nam 2021 tus 2030, wèt tus 2050”.

Tus bal Pơrjum geh ala măt ală Bộ, gah lơh broă dà lơgar, ală càr, ƀòn dờng, ala măt ờ uă Đại sứ quán, ală mpồl lơh broă dunia, mpồl lơh broă tơnguh bơtàu, ala măt ală mpồl lơh sa kă bro, cau bơsram, cau jăk chài kơlôi sơnơng. Broă lơh jŏ jòng tơnguh tơlir ai geh 4 jơnau kờñ kuơ màng, tàm hơ̆ geh: Tơmù tơlik nhơm hìu krơh, Tơlir jơh ală gah lơh sa; Tơlir jơh rài kis mờ chồl pràn broă ngui sa kơl jăp mờ Tơlir jơh broă tam gơl. Kuơ màng, jơnau kờñ sơnrờp ngan là tơmù bơta pràn tơlik nhơm hìu krơh tàm GDP, pơgồp bal lơh jăt jơnau kờñ dơ̆ lĕ bal geh sền gàr tiah kis mờ pơgồp bal nền nòn mờ broă tơnguh bơtàu “mhar, kơl jăp”. Broă lơh jŏ jòng geh ai tơngu me tus nam 2030, bơta pràn tơlik nhơm hìu krơh tàm GDP gơmù ờ uă ngan 15% pơn drờm mờ nam 2014. Ngài rơlao, nam 2050, bơta pràn tơlik nhơm hìu krơh tàm GDP gơmù ờ uă ngan 30% pơn drờm mờ nam 2014.

          Cau mblàng Ndong Brawl