Tŭ do jơh gùt lơgar geh pơgăp 448 rơbô lồ brê tam lơh geh dơm chi dờng, gơguh mhar pơndrờm mờ tơngai lài do. Bơdìh hơ̆, neh geh pơgăp 63 rơbô lồ brê geh tam gơl bơh brê dơm chi dềt tus dơm chi dờng bơh ală broă lơh dong kờl bơh Dà lơgar dê mờ lơh broă bal Dà lơgar mờ làng bol. Bă brê geh sră nggal dờp sền gàr brê kơ̆ kơl jăp jŏ jòng lơh geh mờr 943 rơbô lồ. Bulah neh geh bơtàu tơnguh mờ ală sră nggal dờp sền gàr brê kơ̆ kơl jăp jŏ jòng bơh ală lơgar dê, uă kal ke bơh broă tam brê lơh sa kung gam geh sơl bè tam brê lơh sa rah rài, priă tă lơh sră nggal dờp uă, ờ tơl bơta lơh bal ală bơta kwơ, bơta pràn jak atbồ ờ hoan geh.

Ồng Nguyễn Danh Hùng, Phó Kwang Lam bồ Sờh Broă lơh sa suơn sre mờ Tiah ơm kis càr Nghệ An, pà gĭt: càr geh bơta ƀuơn bơta pràn dờng kơnờm bă ù brê bơnơm ơnàng, uă mpồl lơh sa kă bro lơh gơlik dơm chi mờ ală mpồl lơh broă bal jơh nùs tus bal. Mơya, bă brê tam dơm chi dờng bơh càr Nghệ An dê kung gam ờ hoan uă mờ 33 rơbô lồ lơm. Tàm tơngai tus, nàng tơnguh uă bơta kwơ brê tam, càr Nghệ An pơn jat tai sền gròi tus tam brê dơm chi dờng: “Càr neh ai lơh jat rơndăp ù tiah, tam pà loh làng tiah lơi bơtàu tơnguh brê tam dơm chi dờng, nàng pơlam gùng dà tam brê, pơgồp bal mờ sră nggal dờp brê. Mpồl duh broă Làng bol càr kung neh geh Jơnau lơh nền tàm pơrjum nàng dong kờl tam brê dơm chi dờng, mờ sơnđờm bơh broă ờng sơntìl...”.

Tàm cribơyai, uă cau gĭt wă jrô broă lơh, cau atbồ, cau jak chài ai tơlik uă gùng dà broă lơh nàng bơtàu tơnguh tiah tam brê dơm chi dờng pơgồp bal mờ sră nggal dờp sền gàr brê kơ̆ kơl jăp jŏ jòng dồ bă geh cồng nha. Jat hơ̆, ală broă lơh ndrờm tơrgùm tàm lơh sir adat boh lam, lơh ƀuơn ngan sră pơ àr dờp; ai càn priă dong kờl, sền gàr brê: dong kờl sơntìl niam uă bè keo bơ kiar mô, keo tam ƀội; ngui măi mok sồ tàm atbồ mờ jòi gĭt tiah tờm tam; bơtàu tơnguh lơh bal tăc bro jŏ tơngai mờ giă tăc kơ̆ kơl jăp.

Bơh gah tàm tơrbŏ bal mờ dong kờl măi mok, ồng Hoàng Văn Hồng, Phó kwang lam bồ Anih tờm Pơlam lơh broă sa suơn sre Dà lơgar pà gĭt, pal lơh pràn broă lơh tam brê jŏ nam pơgồp bal mờ sră nggal dờp, mơkung tơnguh tai lơh bal hìu bơnhă làng bol- mpồl lơh broă bal- mpồl lơh sa kă bro- mpồl sră nggal dờp. Jat hơ̆, Gah pơlam broă lơh sa suơn sre rơ̆p pơn jat tai geh gơnoar lơh rƀàng tàm tơrbŏ bal, dong cau tam brê gĭt tus mờ măi mok, broă lơh kơ̆ kơl jăp jŏ jòng mờ drà tăc bro kơ̆ kơl jăp: “Anih tờm Pơlam broă lơh sa suơn sre Dà lơgar kung gam pơn jat tai mờ lơh sùm, sơlơ tơnguh tai broă lơh mblàng yal, bơto pơlam bơta chài tam brê ai làng bol in. Lơh ală rơndăp broă lơh pơlam broă lơh sa suơn sre nàng làng bol in gơtùi sền sơ wì, geh jơnau đơs, bơh hơ̆ ai geh mờng chài rơ̆ ru, nàng lơh gơ rề uă ală broă lơh pơlam broă lơh sa suơn sre tam brê dơm chi dờng dồ bă kơ̆ kơl jăp jŏ jòng”.

 Cribơyai ờ mìng là tiah tam pà mờng chài rơ̆ ru, jòi broă lơh tă bơsong kal ke lơm mờ gam pờ geh tŭ tơngai sơlơ tơnguh tai lơh broă bal đah ală tiah, mpồl lơh sa kă bro mờ cau tam brê. Ală pơlam gùng dà, jơnau hơ mờ dong kờl măi mok bơh anih lơh broă atbồ, mpồl pơlam broă lơh sa suơn sre rơ̆p lơh geh bơta gơn kơnờm pa nàng bơtàu tơnguh tiah tam brê dơm chi dờng pơgồp bal mờ sră nggal dờp sền gàr brê kơ̆ kơl jăp jŏ jòng, pơgồp bơnah tơnguh uă bơta kwơ lơh sa, tam gơl broă lơh sa mờ sền gàr tiah ơm kis.