Nàng tơnguh uă bơta pràn ai kwang bàng kấp sàh, sơnah ƀòn in tàm bơta gơnăp gơnoar kấp mờ atbồ màh sồ geh tam pà kấp pràn tus tàm ƀòn lơgar, Sờh Broă lơh sa suơn sre mờ Tiah ơm kis càr Dăk Lăk pơgồp bal mờ ală mpồl lơh broă gơwèt Bộ Broă lơh sa suơn sre mờ Tiah ơm kis bơyai lơh pơrjum bơsram tàp jăt broă lơh, ai mờ atbồ màh sồ tiah tam, màh sồ hìu dăp di jăt Jơnau lơh nền tàm pơrjum sồ 36 bnơh Chính phủ dê.

Tàm pơrjum, kwang bàng ală sàh, sơnah ƀòn tàm càr Dăk Lăk geh bơto sồr ală bơta pa tàm Jơnau lơh nền tàm pơrjum sồ 36 dê, ai bè broă dờp, bơsong sră nggal tàm internet; broă lơh tàm phần mềm, sền tàm mùl màl mờ jăt sền tiah tam tơnơ̆ mờ tŭ neh ai màh sồ. Is ồn, Jơnau lơh nền tàm Pơrjum pa neh sơrbì jơnau pal jăt bè bă ù ờ uă ngan, rề ơnàng broă lơh màh sồ gơwèt mờ ală tiah lơh sa geh tam phan bơrlŭ bal. Mò Đặng Thị Thủy, Phó Kwang lam bồ Sờh broă lơh sa suơn sre mờ Tiah ơm kis càr Dăk Lăk yal, bơh mùl màl lơh jăt măi mok tàm 72 sàh, sơnah ƀòn bơta pràn lơh đah ală sàh, sơnah ƀòn gam ờ hềt ndrờm bal. Den tàng, càr Dăk Lăk pal kờñ tai broă dong kờl bơh ală mpồl lơh broă tờm bơh Bộ Broă lơh sa suơn sre mờ Tiah ơm kis dê.