Ală plai sầu riêng gam rơhời geh pic bơh rtàm suơn ơnàng 3 lồ 6 sào hìu mò Hồ Thị Huệ, tàm thôn 19/5, sàh Krông Păc, càr Dăk Lăk dê. Kàl tơnhào do, hìu nhă mò tơnhào geh rơlao 90 tấn plai sầu riêng. Jơh ală plai sầu riêng ndrờm geh mpồl lơh sa kă bro dan blơi mờ khà priă 68 rơbô đong tàm 1 kĭ. Mò Huệ pà git, mờ khà priă do geh lơh tàm dơ̆ pơrlòng giá bơyai lơh tơn tàm suơn. “Bol añ kơ̆p kờñ là ală dơ̆ pơrlòng giá do rơ̆p pơn jăt tai bơtàu tơnguh nàng ai phan geh lơh bơh làng bol dê geh tăc ndrờm bal mờ loh làng rơlao”.

Bal mờ suơn hìu mò Huệ, 9 hìu làng bol ndai tàm sàh Krông Păc, càr Dăk Lăk geh kờp jơh bă ù ơnàng rơlao 14 lồ, geh rơwah tus bal dơ̆ pơrlòng giá. Do ndrờm là ală suơn tam sầu riêng Dona geh sră nggal, màh sồ tiah tam mờ jơnau yal bè tơngai lơh broă, phơng sih, jòi tiah tam, kloh niam phan sa mờ bơta geh drơng broă tăc mờ lơgar bơdìh in.

Lài mờ tŭ pơn yòm, mpồl lơh sa kă bro geh tơrbŏ bal nàng tus bal sền tơn tàm tơl suơn. Bơh tàm khà lài ngan 55 rơbô đong tàm 1 kĭ, tơnơ̆ mờ bàr dar đùh sră, giá di pơrlòng giá geh lơh tàm 68 rơbô đong tàm 1 kĭ. Kờp jơh priă lơh broă bal mờr 24 tơmàn đong, uă rơlao mờ priă lài ngan tàm pơgăp 4 tơmàn 500 tơlăk đong. Mò Đinh Thị Hoa, Lam bồ Công ty TNHH Tăc mờ Blơi phan geh lơh bơh broă lơh sa suơn sre Nguyên Thuận pà git: “Công ty bol añ neh lòt sền tơl bă suơn mờ gŏ geh là 10 suơn bơh 10 hìu làng bol lơh broă sa neh geh bơta niam mờ geh khà uă jăt Công ty kờñ. Đah gơnoar atbồ sàh kung neh dong kờl công ty nàng gơtùi tus bal, ai tơl bơta niam nàng mpồl lơh sa kă bro mờ làng bol lơh broă sa gơtùi tàm tơrbŏ bal”.

Bơta pal kah ngan bơh dơ̆ pơrlòng giá ờ mìng tàm khà 68 rơbô đong tàm 1 kĭ, mờ tàm broă yal bè tiah tam geh ai tàm broă kă bro sơl. Mpồl lơh sa kă bro geh tìp bal lài mờ jơnau tơngit bè khà geh, broă lơh, bơta niam bal mờ bơta pràn di pal mờ drà kă bro; cau tam geh tai tơngu me tờm nàng ai tơngŏ bơta kwơ phan geh lơh. Do là gùng dà broă lơh gơdờp bal mờ bồ tơngoh lơh sa kă bro phan geh lơh bơh suơn sre dê: tam gơl bơh tăc khà geh tus mờ tăc bơta niam, jơnau tơngit bal mờ bơta pràn jòi suơn tam. Ồng Lại Đức Đại, Chủ tịch Anih duh broă Làng bol sàh Krông Păc đơs là, do là dùl broă tơrlòng lơh tàm broă bơ̆t bơtàu mpồl gah phan dê, tơnguh broă tơrbŏ bal tơn đah cau lơh mờ drà kă bro. “Làng bol lơh broă sa rơ̆p geh tăc ờ mìng là phan geh lơh mờ là tăc geh bơta kwơ mờ ală cồng nha mờ cau lơh sa di pal geh dờp. Bol añ kung kơ̆p kờñ tơrbŏ bal đah drà kă bro mờ cau lơh sa tus bal tơn, mhar ngan, geh cồng nha ngan, cèng geh bơta di nùs ai jơh ală gah tăc kung bè gah blơi in”.

Bơh tàm mùl màl do, pơrlòng giá gơtùi gơs dùl bơta hòi jà kă bro, tàm hơ̆ uă ngan là gơwèt mờ ală suơn geh bơta niam pơnrơ, phan ndrờm, sră nggal loh làng mờ di pal niam mờ jơnau kờñ tăc mờ lơgar bơdìh. Bơta kwơ màng rơlao, lơh geh broă pal kah ngan, yal bơta niam mờ dong kờl drà kă bro đal git ală tiah tam niam. Mò Đặng Thị Thủy, Phó Kwang lam bồ Sờh Broă lơh sa suơn sre mờ Tiah ơm kis càr Dăk Lăk đơs broă lơh do lơh geh tai bơta pràn nàng cau lơh sa sền gròi tus mờ bơta niam bal mờ broă pơgồp bal lơh. “Broă lơh bnơceh lơh mờ mùl màl nàng làng bol lơh broă sa chờ hờp mờ lơh geh ală bơta pràn tàm bồ tơngoh, bơh broă bơyai lơh sa suơn sre bè ờs den rơ̆p tam gơl tus mờ bồ tơngoh bè lơh sa suơn sre, ai bơta kwơ niam phan geh lơh lài ngan”.

Dùl dơ̆ pơrlòng giá ờ hềt gơtùi tam gơl gùng dà broă tăc bơh gah phan kă bro dê. Mơya, di lah pơn jăt tai lơh gơs, broă sền bơta niam, khà phan geh lơh bal mờ tơngai lơh gơtùi gơs bơta tờm ai geh dùl broă hòi jà kă bro geh cồng nha, tàm hơ̆ uă ngan là gơwèt mờ ală tiah tam, khà phan geh bơta niam uă, di pal niam gơwèt mờ drà kă bro kờñ.