Tus bồ nhai 8, càr Dăk Lăk mìng rơ̆p bơcri rơlao 3 rơbô 200 tơmàn đong, geh rơlao 33% broă rơndăp priă dà lơgar geh jào. Nàng lơh gơs jơnau kờñ bơcri priă geh 68% lài mờ ngai 30 nhai 9, càr Dăk Lăk pal bơcri tai 4 rơbô 200 tơmàn đong, ndrờm mờ di pơgăp 2 rơbô 100 tơmàn đong tàm 1 nhai.

Càr kung gam 181 broă lơh, rơndăp broă lơh gam tìp kal ke, gơkòl, là ală tiah gơkòl dờng ngan pal tơrgùm bơsong nàng ai geh bơta pràn gơguh lơh sa. Ồng Đỗ Hữu Huy, Chủ tịch Anih duh broă Làng bol càr Dăk Lăk sồr ală sờh, gah lơh broă, ală sàh sơnah ƀòn mhar lơh gơs broă tam pà jơh khà priă bơcri gam tai, lơh mhar broă bơcri priă tơn bơh nhai 8 do. Mờ tơrgùm bơsong jơh ală gơkòl bè ù tiah, tơm ntrờm ù tiah mờ sră nggal bơcri priă.