Ală sàh, sơnah ƀòn geh sồr mhar lơh jat Jơnau lơh nền tàm pơrjum sồ 36 Chính phủ dê; rơndap ai priă jền, dờp mờ bơsong di tŭ sră nggal lơh màh sồ tiah tam, màh sồ anih dăp ơn klơm, ờ lời sră nggal gơ tơrgùm wơl tài bơh jơnau gơtùi git lài.

Gia Lai kung sồr lam lơh broă lơh sồ màh sồ tiah tam gơ wèt mờ ală chi tam lơh gơlik phan kă bro tờm ngan, geh bơta pràn tac hờ lơgar ndai; ai lài ală gah phan sầu riêng, plai màk, kơphe, tiêu mờ ală phan tờm ngan ndai. Ală mpồl lơh broă geh gơnoar sơlơ sền swì, di tŭ git gŏ mờ lơh glài kràñ broă lơh tìs sră nggal, cồng nha sền swì phan lơh gơs bơh suơn sre mờ ală broă lơh tìs tàm atbồ, ngui màh sồ tiah tam, màh sồ anih dăp ơn klơm. Gùt càr Gia Lai tŭ do geh 451 màh sồ tiah tam, mờ kờp jơh bă ù rlau 13 rbô 420 lồ. Càr kung geh 53 màh sồ anih dăp ơn klơm tac hờ lơgar ndai, kờp jơh bơta pràn lơh geh bơh 2 rbô 700 tấn plai ris pah ngai.