Bă ù tam sầu tiêng jơh gùt lơgar dê  tŭ do pơgăp 200 rơbô lồ, khà lơh geh kờp dŭ rlau 2 tơlak tấn. Tàm 7 nhai bồ nam do, Việt Nam tăc mờ lơgar ndai 493 rơbô tấn sầu riêng, lơh geh priă lơh geh bơh broă tăc phan mờ lơgar ndai pơgăp rlau 950 tơlak dolar Mỹ, gơguh 31% pơndrờm dùl tŭ bal mờ niam lài; kờp dŭ gùt nam sơr lèt 4 tơmàn dolar Mỹ.

Mơya, bal mờ khà bơtàu tơnguh mhar, gah phan gam kong mờ uă bơta lòng. Tàm Tây Nguyên, trồ prang dờng soăt dà, ờ tơl dà tàm kàl prang gơrềng tus bơta dờng pràn mờ broă gơlik bơkào; tàm tŭ mìu ờ di kàl lơh tơnguh tai bơta gơ rung bơkào, plai bơnung mờ gơlik geh kòp lơh aniai.

Bal mờ bơta gơrềng bơh trồ tơngai dê, jơnau sồr bơh ală drà blơi phan ngai sơlơ kal ke kung ai tơlik bơta kơn jơ̆ dờng gơwèt mờ gah phan dê. Bơh bồ nam 2024 tus tŭ do, lơgar Lo neh tơngkah 761 lồ sầu riêng Việt Nam ờ lơh jat jơnau sồr bè sàng goh phan ngui sa, tàm hơ̆ geh 589 lồ gơrềng tus Cadimi mờ 157 lồ gơrềng tus rơmĭt O.

Tềng đăp ală bơta lòng pa, Tiến sìh Phan Việt Hà, Phó Kwang lam bồ Anih kơlôi sơnơng drơng broă Anih kơlôi sơnơng Jak chài Bơta chài Broă lơh sa suơn sre- Phan brê Tây Nguyên (WASI), đơs là pal tơnguh tai bơcri priă kơlôi sơnơng nàng geh ală bơta jak chài drơng mờ ală broă gơlik geh tàm tŭ tam sầu riêng. “Gơwèt mờ ală bơta lòng pa, pơndrờm bè là tam gơl nhơm trồ tiah, pơn yơu bè là broă cadimium halà rơmĭt o, añ kơlôi là ală anih lơh broă geh gơnoar, tàm hơ̆ geh Bộ Broă lơh sa suơn sre mờ Tiah ơm kis halà ală càr, gơtùi bơcri priă tai nàng geh ală kơlôi sơnơng ngan ngồn kơ̆ kơl jăp. Tŭ mờ bol añ wă broă dùl bă nền nòn bulah geh ală tam gơl tàm sơlơ̆u wơl halà là ală bơta gơlik geh ndai den gơ digơlan ai tơlik ală broă lơh gơdờp mơ tơn nàng dong kờl bơtàu tơnguh sầu riêng”.  

Tàm pơrjum bơyai, ală cau ala mat kung đơs sùm gah phan sầu riêng kờñ pal trờn bơta tờm bơh bơtàu tơnguh bă ù, khà lơh geh tus tơnguh uă bơta bơkah niam mờ geh cồng nha. Rơndăp ù tiah tam pal di pal mờ ală bơta tiah tam; rcang lài dà tuh, bơcri priă lơh ală ding dà tuh dà tềm pềr; tơnguh ngui phơng hữu kơ, lơh niam wơl ù, atbồ kòp lơh aniai tơrgùm bal, mơkung jat sền bơta gơlik geh bơh trồ tiah dê nàng tam gơl niam bơta chài sơng ka sền gàr mờ bơsong tŭ gơlik bơkào.

Ồng Lê Quốc Thanh, Kwang lam bồ Anih tờm Dong kờl pơlam broă lơh sa suơn sre Dà lơgar đơs nền, sàng goh phan ngui sa mờ jòi gĭt tiah tờm tam phan pal geh ơn tàm tiah anih tờm tàm rơndăp broă lơh sa. Do ờ mìng là jơnau sồr bơta chài sơng ka lơm mờ gam là ală bơta nàng sầu riêng Việt Nam in gàr niam drà gam geh tŭ do, pờ ơnàng drà tăc phan mờ lơgar ndai mờ tơnguh bơta kwơ gah phan dê. “Bol añ pal sơlơ tơnguh tai bơta bơtàu tơnguh ală mpồl lơh sa kă bro lơh bal, is ồn là rơndăp gơ gơs ală mpồl lơh broă bal, ală mpồl lơh broă nàng lơh bè lơi bol he bơt bơtàu geh ală tiah tam phan, bal mờ gơ̆p lơh jat di tơl ală jơnau sồr, ală jơnau pal jat... gàr niam geh lơngăp lơngai... Bol he rơ̆p sơnđờm mut lơh ai dùl broă rơndăp lơh lơh broă nàng bơtàu tơnguh gah sầu riêng bơh càr Dăk Lăk dê đơs is mờ tàm tiah do đơs bal nàng bơtàu tơnguh kơ̆ kơl jăp rlau, geh cồng nha rlau".