Mpồl Cau lơh broă sa càr Dăk Lăk tŭ do geh 102 Mpồl kâp hơđơm mờ mờr 300 rbô nă cau tàm mpồl. Tơnơ̆ rơndăp tăp sèng mpồl lơh broă sră pơ àr gơnoar ătbồ, lơh jăt broă lơh tơrlòng lài gơnoar ătbồ ƀòn lơgar bàr kâp mờ tơmŭt bal thôn, ƀòn, jơnum làng bol tiah drà, jơnau sồr tam gơl sồ, bơtàu tơngguh lơh sa mpồl mờ bơ̆t bơtàu ƀòn lơgar pa gơ tơlik jơnau gơ sồr pal tam gơl pa pràn kơldăng tơngume, gùng dà lơh broă bơh mpồl thôn ƀòn dê jăt gùng dà geh kwơ ngan ngồn, geh cồng nha.

Tàm pơrjum cribơyai, ală cau ala măt yal uă broă lơh tơrlòng lài, broă lơh geh cồng nha mờ dan gùng dà broă rơndăp lơh tam gơl pa lơh broă mpồl thôn ƀòn jăt gùng dà dipal mờ jơnau kờñ cau tàm mpồl dê, lơh pràn tam gơl sồ mờ bơtàu tơngguh ală mpồl, jơnum mpồl thôn, ƀòn broă lơh gơ jăt bal mờ lơh sa jăt ală mpồl lơh gơlik phan. Mò Vũ Thị Thúy Hoà, Chủ tịch Mpồl Cau lơh broă sa sàh Ea Drăng yal mờng chài ƀòn lơgar dê bè do:

 “Kờñ lòt bal mờ cau lơh broă sa den lài ngan pal gĭt geh khi kờñ bơta lơi nàng he dong kờl gơ in di mờ gơ in tam toh jơnau kờñ he dê ai. Mờ tơnơ̆ tŭ rơndăp tăp sèng kơ̆ kơl jăp broă lơh tơrlòng pa den pơn jăt tai bơsram tàp nền nòn, ià tê sơnio broă ai tơl nă oh mi lam bồ mpồl thôn, ƀòn in nàng lam lơh mờ broă ătbồ broă jơh ală sră nggal điện tử kung neh geh tơrgùm jơh tàm Google Form”.

Bal mờ ală broă lơh tơrlòng lài geh cồng nha, uă cau ala măt kung ai tơnggĭt ală kal ke tàm lơh broă mpồl thôn ƀòn tơnơ̆ rơndăp tăp sèng mpồl lơh broă sră pơ àr gơnoar ătbồ, ngan là jơnau sồr tam gơl sồ gơ wèt mờ mpồl kwang bàng kâp hơđơm. Mò Châu Thị Hồng Thảo, Chủ tịch Mpồl Cau lơh broă sa sàh Hoà Mỹ yal jơnau đơs bơh mùl màl tàm kâp hơđơm:

“Dan Mpồl Cau lơh broă sa càr bơto pơlam bè tam gơl sồ, pờ tơn ală ơdŭ AI gơrềng tus tơl mpồl, jơnum mpồl tàm kâp hơđơm, nàng tơl nă làng bol tàm ù tiah sàh in ndrờm gĭt mờ ngui măy mŏk AI, is ồn là tàm broă tŭ do pơrlồm tàm anih internet là dùl broă mhar gơrềng ngan”.

Ală cau ala măt ring bal đơs là broă tam gơl pa tơngume, tơngguh uă bơta niam lơh broă mpồl thôn, ƀòn pal gờñ geh lơh loh làng bơh ală gùng dà broă rơndăp lơh dipal mờ bơta mùl màl bơh tơl ƀòn lơgar, tơl mpồl kâp hơđơm dê. Mò H’Giang Niê, Chủ tịch Mpồl Cau lơh broă sa càr Dăk Lăk pà gĭt, ală jơnau đơs, jơnau cih đơs ờ mìng yal uă broă lơh tơrlòng lài, broă lơh geh cồng nha lơm mờ gam dan uă gùng dà broă rơndăp lơh geh kwơ ngan ngồn nàng tơngguh uă bơta niam lơh broă bơh mpồl lơh broă dê.

“Ală tơngume geh cribơyai ring bal pal gờñ geh lơh loh làng gơgơs ală broă lơh, broă rơndăp lơh mờ ală gùng dà broă rơndăp lơh dipal mờ bơta mùl màl tơl mpồl lơh broă, tơl mpồl thôn, ƀòn dê. Tài bè hơ̆, tơl kâp Mpồl cau lơh broă sa, tơl mpồl kâp thôn, ƀòn pal lơh niam gơnoar broă, nùs nhơm rơcăng lài, bơceh lơh, tam gơl pa tàm lam lơh jăt, lơh gơlik gơ tam gơl loh làng bè bơta niam lơh broă bơh mpồl thôn, ƀòn dê. Bol hi rơ̆p tơrgùm wil tơl jơh ală jơnau đơs, jơnau dan nàng kơlôi sơnơng bơtơl, ai tơmŭt tàm ală tơngume broă lơh tàm tơngai tus”.